Notisia

Willemstad – Gobièrnu di Kòrsou a instituí Premio Charlwin “Broertje” Marshall na aña 2018 komo un premio riba área di arte gastronómiko i kulinario. Charlwin “Broertje” Marshall ta un “Master Chef” di mashá renombre, tantu Nashonal komo Internashonal. Pesei e premio aki a keda instituí na nòmber di nos yu di Kòrsou Charlwin Marshall i entrega di e premio ta tuma lugá dia 14 mei 2020.

Ta trata di un premio spesialmente pa hóbennan ku ta studiando òf trahando den e área ariba menshoná. Pa motibu ku tin masha poko inisiativa di premionan ofisial pa hóbennan, Gobièrnu a instituí e premio aki pa ta un motivashon positivo pa nos hóbennan ku ta militá riba e tereno akí. E Premio Charlwin “Broertje” Marshall ta estímulo pa hóben pa trese nan ideanan nobo i original riba e tereno kulinario ku ta un arte riba su mes. Nos platonan krioyo, komo aspektonan importante di nos identidat kultural, ta forma parti di e traspaso di nos grandinan pa nos; nos herensia kultural intangibel.

E premio Charlwin “Broertje” Marshall konosé dos kategoria:

1. “Junior chef”, pa hóben den edat di 16 aña te ku 20 aña;
2. “Senior chef” , den edat di 21 te ku 30 aña.

Pa partisipá i inskribí na e kompetensia pa e premio prestigioso aki bo por tuma formulario na Ministerio di Enseñansa, Siensia, Kultura & Deporte, Sektor di Kultura & Deporte na Koningin Wilhelminastraat #1 óf por yama na 461 5133 pa mas informashon.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte