Publiká riba 07 Yanüari 2020
Despues di kumpli ku inventarisashon Gobièrnu di Kòrsou ta sigui ku e trayekto pa apuntá organisashonnan ku ta kumpli ku kriterionan stipulá pa karga ku e responsabilidat pa manehá un òf otro tereno deportivo a base di kriterionan stipulá. E intenshon ta ku na final di e trayekto akí Gobièrnu ta sera akuerdo di maneho (beheerovereenkomst) ku kada organisashon ku bini na remarke, pa un periodo di 5 aña. Despues di 5 aña lo evaluá i wak si por alargá ku un periodo di 5 aña mas. E akuerdo akí atraves di tempu lo ser kontrolá i supervisá pa FDDK, ku ta resortá bou di e Sektor di Kultura & Deporte ku na su turno lo tene Gobièrnu informá. E organisashon ku keda apuntá ta esun ku lo karga e responsabilidat pa e.o mantenshon i maneho di e fasilidat deportivo. E maneho di fasilidat mester kumpli ku un di e kriterionan importante ku ta dirihí su mes riba entrega di un plan kaminda ta elaborá programanan ku ta stimulá barionan i skolnan rondó di e terenonan deportivo pa hasi uzo di esaki mas tantu posibel i di e manera akí alsa partisipashon aktivo di komunidat na deporte. Esaki lo sosodé den estrecho koperashon ku FDDK. Gobièrnu di Kòrsou den e kuadro akí tin e firme intenshon pa stimulá moveshon aktivo di komunidat.
Tur inskripshon lo keda revisá koutelosamente i den un komishon ta hasi evaluashon di tur inskripshon i skohe esnan ku ta kumpli ku tur e kriterionan pa manehá e fasilidat i tereno deportivo. Pa mas informashon por tuma kontakto ku Sektor di Kulura & Deporte na numbernan di telefòn 461 5133 i 565 7369 of manda un app na (+599 9) 565 7369.
—
KOMUNIKASHON
‑ Link: Kriterionan pa organisashonnan deportivo
‑ Link: Formulario di inskripshon
