Publiká riba 07 Aprel 2019
Willemstad – Resientemente inspektornan di Outoridat di Aviashon Sivil di Kòrsou (CCAA) a risibí training intensivo pa sigurá ku nan ta informá i kalifiká den aspektonan krítiko di supervishon di seguridat den aviashon. Sr. John Pottinger a duna e training. E ta un konsehero i trainer Kanades di seguridat den aviashon, na nòmber di IATA (‘International Air Transport Association’). E training a konsistí di dos kurso kubriendo dies dia di training.
Den e promé kurso, ‘SMS Auditing and Quality Management for CAAs’ e inspektornan a risibí informashon i splikashon di eksigensia global mas resien pa loke ta ouditoria di Sistemanan di Maneho di Seguridat i CCAA su supervishon di proveedornan di servisio den aviashon.
Den e di dos kurso, ‘Lead Auditor Training for CAA’s’ a sigurá ku e inspektornan ta kalifiká i prepará pa guia auditnan di seguridat riba provedornan di servisio i pa tene auditnan interno na CCAA.
Riba invitashon di CCAA, e partisipantenan a konsistí tambe di dos inspektor di Aruba CAA i profeshonalnan for di diferente proveedornan di servisio di aviashon na Kòrsou.
Aña pasá Sr. Pottinger a duna otro training i workshop na CCAA, inkluyendo ‘Managing Accident Investigation,’ ‘Managing Safety Oversight’ i ‘Root Cause Analysis.’
Riba e pregunta tokante di su eksperensia ku CCAA, Sr. Pottinger a bisa “Semper mi ta gusta di traha ku CCAA. E profeshonalísmo di e inspektornan i e kultura di seguridat di CCAA ta riba nivel di klase mundial. Ora ta trata di seguridat di aviashon, un organisashon ekselente ta sirbi e pasaheronan i suidadanonan di Kòrsou.”
Minister Jesus-Leito ta satisfecho ku e training aki mirando ku esakinan ta un paso konkreto pa Kòrsou por kumpli ku tur eksigensia internashonal i pa por pasa e oudit di International Civil Aviation Organization (ICAO) na sèptèmber di e aña aki ku éksito.
