Publiká riba 08 Mart 2018
Gobièrnu di Kòrsou pa medio di Minister di Eneñansa, Siensia, Kultura i Deporte sra. Marilyn Alcalá-Wallé a instalá ofisialmente e komishon ku ta atendé ku kasonan di muchanan i hóbennan indokumentá i ilegal den enseñansa, e asina yamá: “Adviescommissie Ongedocumenteerde en ilegale jongeren” (Komishon di Konseho pa muchanan indokumentá i ilegal).
A bin konstatá ku ya pa hopi tempu kaba hóbennan ilegal òf indokumentá ta keda vários biaha perhudiká den enseñansa pa motibunan fuera di nan alkanse. Pa e motibu aki a instalá un komishon ku ta konsistí di diferente persona importante i instrumental importansha ku tin di haber ku e tema aki. E komishon ta konsistí di Sekretario General di Enseñansa, representantenan di Ministerio di Enseñansa, Ministerio di Hustisia, Ministerio di Servisio Públiko (Kranshi), Ministerio di Asuntunan Soshal i di Labor, Ministerio di Salubridat, Servisio di Skolnan Públiko, sindikato di enseñansa, representashon di mayor i direktivanan di skol. E miembronan ta: sra. Jennifer Suares, sra. Xiandra Rojer, sra. Desiree Sille,sr. Wladimir Kleinmoedig, sra. Sahayra Braun-Nisbet, sra. Minister Marilyn Alcalá-Wallé, sra. Carina Liberia , sra. Marilyn Overman-Thode, sra. Zagrah da Silva i sr. Jeroen Jansen. Por tuma kontakto ku e komishon via di sra. Sahayra Braun-Nisbet via di +5999 434 37 00.
E komishon aki tin e siguiente tareanan:
1.Trese na kla kiko ta e situashon aktual pa loke ta trata muchanan indokumentá i ilegal den enseñansa na Kòrsou;
2. Inventarisá e kantidat di muchanan indokumentá i ilegal ku no a risibí diploma durante e añanan ku ta tras di lomba;
3. Inventarisá e faktornan di protekshon i tambe faktornan di riesgo serka e grupo di hóbennan aki;
4. Inventarisá riba e posibel solushonnan pa enseñansa di fundeshi, enseñansa speshal, enseñansa sekundario, Enseñansa di Fishi i enseñansa avansá;
5. Inventarisá e kantidat di kasonan di muchanan ilegal i indokumentá i referí nan pa ayudo profeshonal kaminda esaki ta nesesario;
6. Hasi inventarisashon basá riba e puntonan ariba menshoná, duna konseho na Konseho di Minister riba pronóstiko i rekomendashon pa aserkamentu di e grupo di muchanan indokumentá i ilegal.
Ku esaki e komishon aki ta sòru pa tur hóben hasi uso di nan derecho i tambe obligashon di partisipá na e proseso di enseñansa, sin ku nan keda perhudiká di partisipá na skol òf risibí diploma pa falta di dokumento. Di e forma aki Gobièrnu di Kòrsou ta traha huntu pa i realisá e vishon di 0-drop-out i mehorashon di nos enseñansa kaminda tur mucha ta desaroyá segun nan máksimo potenshal, konforme e Akuerdo di Gobernashon 2017-2021.
