Publiká riba 17 Desèmber 2020
Ministerio di Hustisia pa medio di e komunikado aki ta informá ku e Komishon independiente ku ta atendé ku Keho kontra Aktuashon Polisial den su funshonamentu a keda instituí pa medio di un dekreto Ministerial di 18 di sèptèmber 2020 nr. 2020/010362. E Komishon aki su base legal ta ankra den Ordenansa di 28 di yanüari 1994 , P.B.1994 no.5 .
Riba proposishon di Prokuradó General y dekano di Órden di Abogado e miembronan pa forma parti di e Komishon a keda nombrá.
E komishon tin komo tarea:
– Inisiá òf laga inisiá investigashonnan independiente di keho nan entregá dor di siudadano relashoná ku aktuashon di un òf mas Polis den nan funshonamentu;
– Traha rapòrt di e resultado nan atkerí for di investigashon nan hasi en kuantu kehonan risibí;
– Proponé posibel medida nan den kaso di aktuashon no korekto den e funshonamentu di e polis;
E siudadano mester tin konfiansa ku ora ku e wòrdu trata dor di un polis ku esaki ta sosodé konforme nos lei nan. Esaki ta trese kuné ku e pueblo mester por konfia ku e ta wòrdu trata na un manera apropiá i hustu.
Polis tei pa Sirbi i protehá!
Ku eksistensia di e komishon aki Ministerio di Hustisia ke sòru pa vigilá i salbaguardiá derechi i siguridat di tur siudadano.
Siudadano nan ku kier hasi entrega di un keho na e Komishon òf ku ker mas informashon, por manda un e-mail na: Klachtenciepoloptreden@gmail.com i por yama durante ora nan di ofisina na 7332045.
