Instalashon di stènt i stelazje riba ruta di Karnaval ta kuminsá di 8 di febrüari
Publiká riba
07 Febrüari 2025
Willemstad – Tim di Prekario Karnaval 2025 ta informá ku for di 8 di febrüari, pa 12:00 di anochi, tur persona ku tin pèrmit pa prekario por kuminsá instalá stènt i stelazje na ruta di Karnaval.
E posibilidat aki ta solamente pa e persona of negoshi ku tin un pèrmit di prekario balido i ku a paga nan drechi di prekario. Nos ta pidi tur persona pa sigui e kondishonnan i reglamentunan vigente pa garantisá un instalashon sigur i ordená.
Kondishonnan importante:
Bou e kondishonnan aki, un persona ta risibí su pèrmit pa prekario
1.E pèrmit ta disponibel semper pa representantenan di Tim di Prekario durante henter e periodo di Karnaval;
2.Mester mustra e pèrmit riba petishon di polis pa por kontrolá;
3.Ta sigui tur indikashon di polis na interes di órden públiko, pas, seguridat i moralidat;
4.Ta sigui tur indikashon di Brantwer na interes di seguridat kontra kandela;
5.Ta sigui tur indikashon di Geneeskundige en Gezondheidszorg (G&GZ) na interes di salú públiko;
6.Ta sigui tur indikashon di Servisio pa Planifikashon Urbano (ROP) na interes di seguridat tékniko di konstrukshon di e struktura;
7.Ta sigui tur indikashon di Projectteam Toezicht en Handhaving (PTH) di Ministerio di Tráfiko, Transporte i Planifikashon (VVRP) na interes di seguridat tékniko di e struktura;
8.Ta garantisá ku e konstrukshon di e opheto ta na satisfakshon di polis, Brantwer, ROP i representantenan di Tim di Prekario, pa e ta bon establesé, sólido i sigur kontra kandela;
9.Ta garantisá ku e opheto no ta mas haltu ku 4 meter kontá for di e punto mas abou;
10.Ta garantisá ku e konstrukshon di e opheto ta konsistí di un solo piso ku dak. No ta permití pa koloká konstrukshon ku vários piso;
11.Ta garantisá ku e opheto tin un trapi sólido ku rant;
12.Ta garantisá ku si e opheto ta sostené ku un ‘steiger’, e ‘steiger’ mester ta sostené ku blòki di semènt;
13.Ta garantisá ku ta kita e opheto promé ku e periodo menshoná riba e pèrmit kaba, na satisfakshon di representantenan di organisashon Tim di Prekario;
14.Ta garantisá ku e tarifa di prekario ta pagá adelanta
15.No ta pèrmití pa stashoná vehíkulo patras di e parselanan;
16.E persona ku tin e pèrmit mester tene na konsiderashon ku:
a. E pèrmit otorgá ta personal, no-separabel, no-transferibel i no-transmitibel;
b. Dokumentonan legal ta nesesario pa uzo komersial di un parsela;
c. Ophetonan ku no a wòrdu kita (na tempu) lo wòrdu kita riba gastu di e persona ku tin e pèrmit;
d. Si e parsela NO keda limpi i na òrdu, e persona ku tin e pèrmit lo pèrdè preferensia riba e parsela pa próksimo periodo di Karnaval;
17.Si no ta kumplí ku e kondishonnan den e pèrmit, e persona ku tin e pèrmit no lo por haña pèrmit pa próksimo temporada di Karnaval.
Tim di Prekario lo ta trahando huntu ku e instansianan kompetente pa kontrolá si e reglamentunan ta wordu respetá. Si un persona ku tin e pèrmit no ta sigui e reglamentunan, e konstrukshon por wòrdu kita.
