Publiká riba 26 Febrüari 2019
Relashoná ku e desishon di gobièrnu Venezolano pa sera fronteranan aéreo i marítimo pa karga i pasaheronan ku no ta prosedente di Venezuela i un posibel siere total di frontera entre Venezuela i Kòrsou, Minister di Hustisia Quincy Girigorie a formulá i adaptá reglanan i duna instrukshonnan spesífiko pa loke ta trata personanan di nashonalidat Venezolano ku di un òf otro forma por (a) wòrdu afektá dor di e siere di frontera aki, den kaso ku e ta difikultá regreso pa nan pais Venezuela i komo tal ta kore e riesgo di kai den ilegalidat pa e motibu aki.
Puntonan importante di ahuste
Turistanan
– Na prome lugá ta konsehá e turista Venezolano pa hasi su máksimo esfuerso pa regresá su pais di prosedensia promé ku e periodo di su estadia turístiko kaba, via di rutanan alternativo. Sinembargo teniendo kuenta ku e situashon pekuliar aktual, Minister di Hustisia ta duna un espasio di dos (2) siman di tempu despues ku a sera fronteranan pa karga i pasaheronan ku no ta prosedente di Venezuela (te ku 10 di mart 2019), pa e turista en kuestion por buska un ruta alternativo pa por regresá Venezuela. Durante e periodo aki, personanan ku nan pèrmit di estadia turistiko a vense pa motibu ku nan no por a regresá nan pais, lo no risibí un dekreto di ekspulshon (verwijderingsbeschikking) a base di kua nan no por drenta pais Kòrsou legalmente pa un periodo definí.
– Despues di 10 di mart 2019 si e turista no logra sali, lo e mester entregá un petishon konforme reglanan vigente i kumpli ku rekisitonan manera pago di leges, pa alargá su estadia komo turista na Kòrsou (‘toeristisch verblijf’)
– Si sosodé ku e siere di frontera na final di e periodo di e alargashon aki ta na vigor ainda (òf salida for di Kòrsou pa Venezuela ainda ta sumamente difisil), e turista pa evitá ku e ta permanesé na Kòrsou na un forma indokumentá, por entregá un petishon pa un pèrmit di estadia korto kumpliendo a la bes ku rekisitonan ku lei ta preskribí.
– Turistanan ku yega na aeropuerto ku un pasashi (di tránsito), pa sigui biaha bai Venezuela, lo wòrdu retorná pa e pais for di kua nan a yega Kòrsou. Lo no permití pasaheronan ku tin Venezuela komo destinashon final, drenta i permanesé na Kòrsou teniendo na kuenta ku nan no por sigui biaha. Lo anunsiá esaki na tur kompania di aviashon.
Pèrmit di estadia
– Lo alargá pèrmit di estadia di personanan Venezolano ku tin e pèrmit temporal korto aki pero kual pèrmit a kaduká durante di e periodo di siere unilateral di fronteranan aéreo i marítimo ku ta na vigor aktualmente òf regreso pa Venezuela ta sumamente difisil. E personanan aki mester entregá un petishon ofisial pa e alargashon (‘verlengingsaanvraag’) aki i kumpli ku rekisitonan di e petishon konserní, manera lei ta preskribí.
– Personanan Venezolano ku nan pèrmit di estadia entretantu a kaduká durante e último simannan aki, por haña un alargashon di esaki i lo no risibí un dekreto di ekspulshon (verwijderingsbeschikking) a base di kua nan no por drenta pais Kòrsou legalmente pa un periodo definí. Den e kaso aki e personanan mester hasi un petishon pa pèrmit di estadia korto (‘vergunning kort verblijf’) pa un periodo di máksimo 6 luna.
E instrukshon aki ta drenta na vigor entrante e fecha ofisial di e siere unilateral di e fronteranan aéreo i marítimo pa karga i pasaheronan ku no ta prosedente di Venezuela entre Kòrsou i Venezuela te ku e fecha ku e fronteranan bolbe habri òf ku regreso pa Venezuela ta posibel.
Konsiderando e situashon aktual, Minister di Hustisia lo sigui evaluá si ta nesesario pa bini ku mas ahuste di e maneho di Imigrashon i Atmishon aktual. Eventual ahustenan lo keda anunsiá despues.
