Publiká riba 26 Yanüari 2018
Minister di Enseñansa, Siensia, Kultura i Deporte, sra. drs. Marilyn Alcalá-Wallé, a hasi entrega na direktivanan di skol di fundeshi e promé ehemplar di e bukinan di ‘Volgtoets’ pa e pruebanan di Aritmétika i Matemátika ku ta bai realisá na mitar di kaminda di e aña eskolar akí. Esaki ta destiná pa grupo 6 i 7 di skol di Fundeshi.
Na su turno Sentro di Ekspertisia pa Prueba & Eksamen (ETE) di ministerio di Enseñansa, Siensia, Kultura i Deporte, riba enkargo di minister di Enseñansa, a entregá na e skolnan di enseñansa di fundeshi, e promé ehemplar di e bukinan di ‘Volgtoets’.
Esaki ta sigur un paso importante di kalidat!
Manera ta konosí e úniko instrumento uniforme i ophetivo ku te awor nos konosé na Kòrsou den enseñansa di fundeshi ta e prueba di EFO pa ‘grupo 8’ i solamente pa 2 área di enseñansa, esta pa Aritmétika i Matemátika i pa Idioma Letra & Komunikashon, tantu pa papiamentu komo pa hulandes. Pa falta di pruebanan uniforme i ophetivo (prueba no ligá na un método) pa e otro gruponan den enseñansa di fundeshi, a kuminsá algun aña pasá, riba enkargo di ministerio di Enseñansa, ku un trayekto pa desaroyá ‘volgtoets’ i na promé instansia a start ku e área di Aritmétika i Matemátika.
‘Volgtoets’ tin un meta diferente for di e prueba di EFO. Miéntras ku prueba di EFO tin komo meta evaluá un solo biaha na final di enseñansa di fundeshi pa por determiná si un alumno ta dominá sufisientemente e ophetivonan didáktiko klave (kerndoelen) pa e por kualifiká pa pasa pa e siguiente nivel di enseñansa, ‘volgtoets’, ta kontinuá regularmente durante henter e periodo di enseñansa di fundeshi.
Meta ta un mihó kontròl i ahuste na tempu di e proseso di siñamentu pa e alumno, loke ta kontribuí na un mihó resultado edukativo na final di enseñansa di fundeshi. E tareanan di e ‘volgtoets’ ta independiente di método; nan ta diseñá a base di metanan klave i e liñanan didáktiko di loke pa grupo òf klas mester trata ku e alumnonan promé ku nan por pasa pa e siguiente nivel. Pa tal motibu ‘volgtoets’ ta balioso pa na sierto momento por indiká unda e alumnonan i e skolnan ta pará durante e aña eskolar respekto di e metanan klave i e liñanan didáktiko. menshoná.
Ta brinda skol- i alumnonan e ‘volgtoets’ pa realisá e pruebanan, ku e konvikshon ku optené un bon bista riba desaroyo di e alumnonan ta importante pa prepará nan debidamente pa bai studia na e siguiente nivel di enseñansa. Esaki ta permití e dosentenan mónitòr kalidat di e proseso edukativo, registrá i ahustá desaroyo di e alumnonan segun grupo i eliminá eventual hiato na tempu.Ophetivo prinsipal di ‘volgtoets’ ta optené un bista konfiabel di desaroyo di e alumnonan. Di e forma akí ta oumentá e posibilidatnan pa alumnonan den enseñansa di fundeshi, loke ta redusí e kantidat di drop-out prematuro.
Intenshon ta pa pronto e pruebanan di ‘volgtoets’ pa Aritmétika i Matemátika tuma lugá na mitar di kaminda di e aña eskolar akí den e gruponan 6 i 7 i pa na fin di e aña eskolar realisá e pruebanan di e ‘volgtoets’ final pa Aritmétika i Matemátika den e gruponan di 3 te i ku 7. Entretantu a start ku desaroyo di ‘volgtoets’ pa papiamentu i hulandes tambe.
Pa mas informashon por klik riba e link aki: Powerpoint Presentatie Volgtoets
