Publiká riba 25 Ougùstùs 2023
Willemstad- Djárason 23 di ougùstus 2023 Minister di Desaroyo Ekonómiko, sr. Ruisandro Cijntje a introdusí un tarifa spesial pa uso di awa di irigashon pa nos sektor di agrikultura. Awa di irigashon ta konosí pa mehorá kalidat di kosecha i alsa produkshon. Pues introdukshon di e tarifa spesial akí, tin komo meta pa stimulá nos sektor agrario lokal pa produsí mas fruta i berdura lokal na un preis atraktivo i kompetitivo pa nos komunidat. Introdukshon di e tarifa spesial aki pa uso di awa di irigashon, lo mester kontribuí tambe na baha e gastunan di hasi negoshi pa e komersiante agrario lokual alabes lo kondusí na ekspanshon di e sektor, kreashon di mas kupo di trabou i redukshon di importashon di sierto produktonan agrario.
E trayekto pa uso di awa di irigashon den sektor agrario ta e promé paso pa por yega na awa di segundo grado pa agrikultura. Den futuro, e uso di awa di segundo grado lo pone ku agrikulornan ta paga un preis redusí pa awa i por kultivá mas fruta i berdura lokal na un preis pagabel.
Agrikultornan lokal ku tin un pèrmit di establesimentu (vestigingsvergunning) pa kultivashon di fruta i berdura, ta inskribí na Kámara di Komersio i tin un sistema di irigashon instalá pa distribushon di awa pa nan plantashon, por bini na remarke pa awa di irigashon na e tarifa nobo aki. Esakinan ta e kondishonnan prinsipal pa por bini na remarke, pero den e dekreto tin mas kondishon ku ta keda menshoná. Sobrá kondishonnan i informashon tokante e introdukshon di e tarifa spesial pa awa di irigashon, ta menshoná den e dekreto 91 ku a keda públika riba e website di Bureau Telecommunicatie & Post (BTP) bou di tarifa pa elektrisidat di sèptèmber 2023, i kual ta drenta na vigor 1 di sèptèmber próksimo. Ta bon pa konsultá e website di BTP regularmente en konekshon ku tarifanan vigente, ya ku esakinan ta keda adaptá un bes pa luna.
Ku introdukshon di e tarifa nobo aki Minister Cijntje ta bolbe mustra ku e ta sigui traha na benefisio di agrikultornan lokal tambe.
