Publiká riba 15 Novèmber 2023
EU Desk Curaçao ku kurso piloto eksitoso den koperashon ku CITI
Willemstad- Resientemente EU Desk Curaçao, un departamento den Ministerio di Desaroyo Ekonómiko (MEO), a organisá un kurso titulá :
‘Introduction to Grant Seeking Fundamentals’ (Basenan pa skirbi un petishon pa supsidio). E kurso akí a tuma lugá komo un proyekto piloto, den koperashon ku Centrum voor Innovatie en Technologie (CITI). E fase piloto akí di e kurso ‘Introduction to Grant Seeking Fundamentals’, a konta ku 7 partisipante di diferente organisashon lokal kende a pasa dor di temanan esensial pa siña mas a fondo tokante skirbimentu di nan petishonnan pa supsidio, prinsipalemente di fondonan di Union Oropeo.
E kurso a keda repartí den 4 diferente seshon i bou di guia di un di e konseheronan di EU Desk, sra Margit de Freitas MBA, e partisipantenan a risibí informashon ekstenso riba temanan manera entre otro: introdukshon na skirbimentu di un petishon pa supsidio, investigá i identifiká posibilidatnan di finansiamentu i análisis di nesesidat i planeamentu di proyekto. Na final di e kurso, kada kursista tabatin un deskripshon di su propio proyekto pa kua e ta buska finansiamentu i tambe un konsepto di e proposishon pa nan propio petishon di supsidio.
Meta di e kurso piloto akí tabata, pa reforsá organisashonnan lokal ku e konosementu i abilidatnan nesesario pa nan por desaroyá nan propio strategia kon pa hasi petishon pa – i atkerí supsidionan. Ku esaki, nan por buska finansiamentu eksitósamente pa nan proyektonan serka entre otro Union Oropeo (EU).
E direktor di EU Desk Curaçao, sra Vanessa Toré MBA, a hasi entrega di sertifikado na kada partisipante na final di e kurso i a enfatisá kon importante ta ku nan a tuma e paso akí pa amplia nan konosementu i krese den e tema akí.
Ku e kurso sumamente eksitoso akí, EU Desk Curaçao ta kontinuá su esfuersonan kontinuo pa reforsá nos komunidat pa medio di edukashon i sosten riba tereno di skirbimentu di petishonnan pa supsidio i atkisishon di e supsidionan akí. Pa meimei di luna di desèmber próksimo lo start ku un ronda nobo di e kurso ‘Introduction to Grant Seeking Fundamentals’ i ta e intenshon pa ofresé esaki tambe un par di biaha den aña 2024 na mas instansia i empresanan lokal. Di e forma akí, brindando kapasitashon kada bes na mas persona pa yega na fondonan tantu di Union Oropeo (EU) komo tambe otro fondonan disponibel.
Pa mas informashon, por tuma kontakto ku sra Vanessa Toré na vanessa.tore@gobiernu.cw òf telefónikamente na 462-1444.
Riba e foto: Partisipantenan di e kurso huntu ku representantenan di EU Desk Curaçao i CITI.
Parti patras: Eunice Eisden & Vanessa Toré (EU Desk Curaçao), Jumarie Chap (PSI Skuchami), Armgard Sasso (Fundashon Mundu Nobo), Kermeline Chakoetoe (PSI Skuchami) Suhaily Hooi (ClTI), Margit de Freitas (AddValue Consulting).
Dilanti : Terence Chin & Ashwyn Behilia (Stichting Curaçao Outdoor Industry Alliance), Gerdy Principaal (Uitvoeringsorganisatie Openbare Werken), Rensley Victoria (Fundashon Nieuw Nederland Nobo).
————————-
Tokante EU Desk Curaçao: EU Desk Curaçao ta un inisiativa di Ministerio di Desaroyo Ekonómiko (EU) i tin e meta pa sostené organisashonnan lokal durante petishon i maneho di supsidionan Oropeo. Pa medio di programanan edukativo, workshops i guia individual, EU Desk Curaçao ke alsa e kapasidat di organisashonnan lokal i kontribuí na desaroyo duradero di nos pais. Dia 8 di desèmber próksimo, EU Desk Curaçao ta kumpli 5 aña di eksistensia.
Tokante Centrum voor Innovatie en Technologie (CITI): CITI ta un partner sumamente importante di EU Desk Curaçao i ta brinda fasilidatnan i sosten pa desaroyonan inovativo i teknológiko na Kòrsou. . Kolaborashonnan manera esaki, ta kontribuí na amplia e ekspertisio di nos komunidat i stimulá kresementu den diferente sek
