Inventarisashon di Tereno i Fasilidatnan Deportivo - Informashon tokante Gobièrnu di Kòrsou Bo opinion

Notisia

Inventarisashon di Tereno i Fasilidatnan Deportivo

Geplaatst op 18 September 2019 dor di Ministerio Enseñansa, Siensia, Kultura & Deporte

WILLEMSTAD- Gobièrnu di Kòrsou pa medio di esaki ta informá pueblo di Kòrsou en general ku den kuadro di yega na e maneho nobo pa e 164 terenonan deportivo na Kòrsou, ta inisiá trabounan di inventarisashon di e estado físiko di fasilidatnan deportivo den transkurso di tres i e delaster siman di luna di sèptèmber 2019. Gobièrnu ta pidi pueblo koperashon i sosten pa realisá e trabounan akí.

Gobièrnu di Kòrsou, den pasado a pasa un kantidat di tereno deportivo pa Fundashon SEDREKO. Na momento ku SEDREKO a keda desmantelá, e terenonan a keda debolbé na Gobièrnu.

Konforme e akuerdo di gobernashon i Gobièrnu di Kòrsou su afan pa stimulá i halsa partisipashon aktivo i pasivo di pueblo na deporte, ta desaroyá un maneho pa e 164 terenonan di deporte. E maneho akí gobièrnu ta ehekutá pa medio di kolaborashon entre e ministerio di Enseñansa, Siensia, Kultura & Deporte (ESKD), ministerio di di Tráfiko, Transporte i Planifikashon Urbano (TTPU) i mas organisashon. E organisashonnan ta konsistí di representantenan di Sektor di Kultura i Deporte, departamentu di Servisio di Atministrashon i Maneho di Terenonan Públiko (Domeinbeheer), departamentu di Planifikashon Urbano (ROP) i Fundashon Desaroyo Deportivo Kòrsou (FDDK). E grupo akí ta bai kana un trayekto pa implementá maneho pa ku fasilidatnan deportivo. Un di e promé tareanan ku e tim akí ta realisá ta duna un bista di e situashon aktual di e terenonan deportivo pa medio di hasi un inventarisashon di e estado di e fasilidatnan deportivo i nan respektivo terenonan.

Abase di e resultado di e inventarisashon ta bai implementá un maneho nobo riba repartishon i mantenshon di e terenonan. Pa lokual ta trata mantenshon di terenonan esaki lo keda planifiká den fase i abase di petishonnan lo fiha prioridat. Pa partisipashon aktivo ta sigui ku un sondeo den diferente bario  serka organisashon nan ku ke tuma e maneho di e terenonan. Seguidamente lo bin proposisihon pa sera un akuerdo di maneho di tereno deportivo ku e diferente organisashonnan ku por presentá un plan pa por manehá e tereno i stimulá práktika di deporte.

Gobièrno di Kòrsou ta traha na benefisio di e desaroyo deportivo di nos nashon i ta pidi pueblo koperashon i sosten pa realisá e trabounan akí

Sra. Lizette Sambo-Velder

Direktor di Sektor di Kultura & Deporte

Ministerio di Enseñansa, Siensia, Kultura & Deporte

Ministerio konserní