Invitashon na Kòrsou pa huntu ban sera e aña di kaha di òrgel riba Plaza Brion - Informashon tokante Gobièrnu di Kòrsou Bo opinion

Notisia

Invitashon na Kòrsou pa huntu ban sera e aña di kaha di òrgel riba Plaza Brion

Geplaatst op 13 December 2019 dor di Ministerio Enseñansa, Siensia, Kultura & Deporte

 

WILLEMSTAD – Gobièrnu di Kòrsou ta mira ku satisfakshon bèk riba un Aña di Ka’i Òrgel ku a trese nos kahanan di òrgel den lus di dia, kompaña pa e wiri. Nos komunidat a haña e oportunidat di bira mas konsiente di eksistensia i uso di nos kahanan di òrgel i e diferente rítmonan ku ta keda komponé i butá riba e kaha. Un aña asin’aki tabatin su retonan ku e Komishon aña di Ka’i Òrgel a konfrontá i mayoria a keda surpasá. Tabatin diferente proyekto i aktividat, salí for di tantu Gobièrnu komo di inisiativanan partikular. Den tur skina nos por a topa un kaha di òrgel. Un palabra di gratitut ta bai pa tur ku a pone nan skouder bou di e aña di Ka’i Òrgel. Por mira bèk riba un aña bunita i eksitoso.

P’esei riba dia 15 di desèmber 2019, ku alabes ta dia di Statüt, di 18:00 pa 22:00 or ta klousurá e aña di kaha di òrgel riba Plaza Brion. Riba e dia di Statüt aki ta selebrá nos kultura den un dushi ambiente di nos herensia musikal i presentashonnan elokuente di nos mes artista i personahenan. Ta bai tei riba Plaza Brion e.o. nos ganadó di Premio Cola Debrot sr. Cesario Jean Louis i alabes ta duna honor na nos baluartenan di kaha di òrgel, presentashon di Kolegio Chaya Willems, Kolegio Ellis Juliana, Kolegio Berg Carmel i tambe Kolegio Dividi, gruponan di baile manera SKOBA, Dúndula, Grupo di Fuik, CCC i SEFBA ta presente pa deleitá i duna nan presentashon. E anochi tambe lo keda koroná ku nos kaha di òrgelnan ku lo profilá durante diferente aktividat.

Pueblo di Kòrsou su presensia ta keda altamente apresiá pa asina nos klousurá nos aña di piano di silinder, nos Ka’i òrgel 2019 #huntu!!


KOMUNIKASHON

Den aña di Ka’i Òrgel nos a Tok’é, Skuch’é, Bail’é i Klab’é te den nos kurason di Punta’riba te Punt’a bou!

Ministerio konserní