Publiká riba 31 Ougùstùs 2026
Willemstad – Den antesala di Curaçao North Sea Jazz Festival, Ministerio di Desaroyo Ekonómiko (MEO) ta organisá Jazz Vibes atrobe. Djárason 2 di sèptèmber, di 7’or pa 10’or di anochi, Wilhelminaplein, Punda, lo yena ku músika ku presentashonnan di Tempo Music, AXL & Friends i Hershel Rosario & Friends.
E aña aki Jazz Vibes ta amplia ku ‘Jazz Vibes Music & Art Education Week 2026′. Banda di músika en bibu, MEO ta trese durante henter e siman músikonan, artistanan, studiantenan i empresarionan kreativo lokal huntu ku profeshonalnan internashonal pa kompartí konosementu, amplia nan netwerk i eksplorá oportunidatnan komersial i internashonal den e industria kreativo.
Invitadonan spesial ta Dr. Fahamu Pecou i Esohe Galbreath di African Diaspora Art Museum of Atlanta (ADAMA), i produktor musikal, manager di artista i edukadó Ben Yonas for di Atlanta. Pecou i Galbreath lo konektá ku e sektor di arte i kultura di Kòrsou riba desaroyo artístiko, emprendementu kultural i koperashon internashonal. Yonas lo traha ku e sektor musikal lokal riba edukashon musikal, desaroyo di artista, e parti komersial di industria di músika i akseso na merkadonan internashonal.
Interesadonan por partisipá tambe na dos masterclass grátis. Djaweps 3 di sèptèmber di 9’or di mainta pa 12’or di mèrdia, Ben Yonas lo presentá na MEO: “Music Beyond the Stage – Building Sustainable Careers, Global Markets & Curaçao’s Music Industry.” E mesun dia, di 2:30 pa 4:30 di atardi, Dr. Pecou i Esohe Galbreath lo duna e masterclass kreativo “From Artistic Voice to International Opportunity – Building a Sustainable Creative Practice.”
Banda di e programa públiko, durante e siman lo tuma lugá varios seshon profeshonal riba invitashon. E seshonnan aki ta dirigí riba desaroyá koperashon konkreto entre Kòrsou i Atlanta den músika, arte, edukashon, interkambio kultural i akseso na merkadonan internashonal.
Ku Jazz Vibes, MEO no ke solamente ofresé talento lokal un plataforma, pero tambe kontribuí na un industria kreativo mas fuerte, kaminda talento, emprendementu i oportunidatnan internashonal ta konektá ku otro. Bishitá e siguiente link pa registrá pa e seshonnan di JAZZ VIBES – MUSIC & ART EDUCATION WEEK 2026: https://bit.ly/MusicArtEducationWeek2026
Nos ta spera tur interesado na Jazz Vibes, djárason 2 di sèptèmber di 7:00’or pa 10:00’or di anochi na Wilhelminaplein den Punda. I na Music & Art Education Masterclasses riba djaweps 3 di sèptèmber na MEO.
Jazz Vibes 2026 – Learn. Create. Connect. Go Global.
