Notisia

Kampaña di konsientisashon “Duna Mi Dos”

WILLEMSTAD– “Duna Mi Dos” ta un ‘jingle’ ku a keda kreá dor di Tio Ali ku e meta pa pone énfasis di un forma rítmiko i kreativo riba aspektonan di prevenshon kontra kontagio ku Covid-19. Tio Ali a entregá e jingle aki na Minister di Enseñansa, Siensia , Kultura i deporte, Sr. Steven Croes: “Duna Mi Dos”, den forma di un dramatisashon na alumnonan di Skol di Fundeshi San Martin de Porres na Santa Rosa.

Minister Croes ta sumamente kontentu ku e jingle aki, mirando ku esaki ta un forma fásil, prèt i kreativo pa rekordá nos muchanan e reglanan di distansia sosial i higiena. Minister Croes ta aploudí tambe e inisiativa di Tio Ali ku di e forma aki ta usa su talento i konosementu pa duna un kontribushon aktivo den nos bataya kontra Covid-19. Nos promé minister, Eugene Rhuggenaath ya a yega di hasi un yamada na nos artistanan lokal pa duna un man den konsientisashon di nos komunidat pues Gobièrnu di Kòrsou sigur ta sumamente kontentu ku “Duna Mi Dos”.

E jingle a keda komponé riba inistativa di sr. Theo Kabuki Frans i sr. Rodger Bijsberta i graba pa Lindo Recording Studio. Tio Ali a presentá esaki na nos Ministerio di ESKD komo ku esaki por promové e jingle den skolnan pa atraves di nos muchanan nos yega na henter e komunidat.  Ministerio di ESKD ta karga e kampaña aki huntu ku Tio Ali pa ban traha riba konsientisashon aktivo pa ku COVID-19. Próksimamente, “Duna Mi Dos” ta keda mandá pa tur skol i organisashon ku ta traha ku mucha pa di e forma aki nos kontinuá e kampaña pa konsientisá i rekordá nos muchanan tur pa ban sigui “Duna Mi Dos” (#dunamidos).

Un yamada ta bai na kada persona pa tuma nota di e “Jingle” aki i traha bo vershon artístiko di esaki i usa e hashtag nan #dunamidos, #tioali i #mowcs i asina lanta e kampaña di konsientisashon den nos komumidat. Tambe nos ta pidi pa mail nos bo vershon na OWCS.Communicatie@gobiernu.cw i esaki ta keda publiká riba página soshal di Ministerio di Enseñansa, Siensia, Kultura i Deporte. Ban duna nos aporte komo suidadano síviko na e kampaña “Duna Mi Dos” i asina yuda konsientisá nos komunidat pa ban sigui kuida den e situashon aktual. Pa mas informashon di e jingle mail nos na OWCS.Communicatie@gobiernu.cw of tuma kontakto ku Lindo Recording Studio via di +599 9 527 2050 o/i lapcasper@yahoo.com.

**Den e potrètnan athunto por tuma nota di e entrega na Minister Croes i presentashon di alumnonan di Kolegio San Martin de Porres.
#dunamidos #tioali #mowcs

MAS NOTISIA

Ministerio konserní: Enseñansa, Siensia, Kultura & Deporte