JVO 2018: Mas koperashon entre kadenanan hudisial di Reino Hulandes - Informashon tokante Gobièrnu di Kòrsou Bo opinion

Notisia

JVO 2018: Mas koperashon entre kadenanan hudisial di Reino Hulandes

Geplaatst op 18 January 2018 dor di Ministerio Hustisia

E Justitieel Vierpartijen Overleg (JVO) ku ta tuma lugá dos bes pa aña entre Ministernan di Hustisia di e kuater paisnan: Kòrsou, Sint Maarten, Aruba i Hulanda (representando a la bes e islanan BES), e biaha aki a tuma lugá na Kòrsou. Di 15 pa 17 di yanüari Minister di Hustisia señor Quincy Girigorie tabata anfitrion di e JVO ku a tuma lugá na Santa Barbara Beach Resort. Durante di e JVO ministernan Ferdinand Grapperhaus (Hulanda), Andine Bikker (Aruba), Cornelius de Weever (Sint Maarten) i Quincy Girigorie (Kòrsou) kompañá pa nan respektivo delegashonnan a bini huntu pa elaborá riba vários tema di importansia pa e tereno hudisial. Alrededor di 50 trahadó di hustisia di e paisnan di Reino a partisipá. E temanan tratá durante di JVO a enfoká riba kon e kadena hudisial di e paisnan di Reino por ta mihó prepará pa kombatí entre otro krímen organisá, krímen ku ta krusa frontera, atakenan terorista i trafikashon di hende.

Sentro di Akshon Kòrsou
Promé punto riba agènda di e edishon aki di JVO tabata un presentashon di Minister di Hustisia di Kòrsou di e ‘Actiecentrum Ondermijning Curaçao’ (Sentro di Akshon Kòrsou) presidí pa e titular di hustisia. Den e presentashon aki presentenan por a tuma nota di e forma integral di kombatí kriminalidat aki na Kòrsou ku a keda introdusí pa Minister Girigorie. A mustra kon partnernan den e kadena hudisial ta traha huntu, kompartí informashon i bini tambe ku akshonnan huntu pa kombatí krímen i mantené órden i seguridat den komunidat.

‘Afpakteam’ i Wardakosta
A para ketu na e éksito di e asina yamá ‘Afpakteam’ i a elaborá kon ta sigui ku esaki den futuro. E bon koperashon entre ‘afpakteam’ di e diferente paisnan di Reino tambe ta duna su fruta den kombatimentu di kriminalidat. Wardakosta tambe ta un di e temanan ku a keda tratá durante di e JVO i partikularmente plannan pa reforsá tareanan di Wardakosta. A evaluá aspektonan di maneho i e ròl di Wardakosta en general i tambe e desaroyo di e problemátika ku personanan prosedente di Venezuela ku antesedentenan kriminal ku ta drenta e paisnan na forma ilegal ku arma i òf droga.

Régimen di Detenshon
Otro punto ku a para ketu riba dje durante di e JVO ta pasonan pa yega na un Areglo di Detenshon (Onderlinge Detentieregeling) entre e paisnan lokual ta krea posibilidat di detenshon di detenidonan den e diferente sentro di detenshon den Reino. Esaki riba petishon spesífiko i debidamente motivá di parti di e detenidonan mes òf di kualke otro entidat hudisial. E paisnan a deliberá tambe riba diferensiashon di régimen penitensiario pa yega na diferente tipo di sentro di detenshon teniendo kuenta ku entre otro detenidonan ku tin mester di kuido sikológiko/sikiátriko òf kualke otro tratamentu spesífiko.

Prevenshon
Un otro aspekto di kombatimentu di krímen ku a trata durante di JVO ta e parti di prevenshon. A elaborá tokante programanan di prevenshon entre e paisnan ku ya ta dunando resultado den bahada di sifranan di kriminalidat i a yega na akuerdonan pa ku koperashon entre e paisnan pa e próksimo añanan.

Evaluashon di RST
Un tema relevante ku a keda tratá un biaha mas durante di e JVO ta e evaluashon di RST. Den e JVO na Sint Maarten di yüli 2017 e ministernan di Sint Maarten i Kòrsou a ekspresá e nesesidat pa un evaluashon di RST. Durante di e JVO na Kòrsou a bai di akuerdo pa hasi e evaluashon aki. Intenshon di koperashon entre e paisnan ta, pa un yuda i fortifiká otro. Pa e motibu aki evaluashon di entre otro e funshonamentu di RST, su aporte na mantenshon di órden i kombatimentu di kriminalidat den nos pais i su sosten na nos kuerpo lokal ta nesesario. Pues evaluashon no nesesariamente ta algu negativo pero por por kontribuí na optimalisashon di e koperashon.

ICT
Otro tópiko sumamente importante ku a trata durante di e JVO ta koperashon den uso di ICT den kombatimentu di krímen. E partisipantenan a haña presentashonnan riba diferente posibilidat den sistemanan di ICT. A yega na palabrashonnan pa sondea kon por apliká e sistemanan pa kompilá informashon i kon e paisnan por koperá ku otro den kompartimentu di informashon ku otro.

Algun tema m as di atenshon
Mas aleu a trata diferente otro tópiko manera koperashon den maneho di imigrashon, kriminalidat ku ta krusa frontera i posibilidatnan pa un Akademia di lei (‘wetgevingsacademie’) pa trein mas hurista den téknika di traha lei. Tambe a atendé plannan anual, presupuesto i kuentanan anual di sierto órganonan hudisial.

JVO 2018
E reunion di JVO a kana den un bon esfera i Minister Girigorie ta satisfecho ku e logro i stapnan pa ku koperashon den Reino pa loke ta trata Hustisia i Seguridat. Den e siguiente JVO lo sigui elaborá riba algun di e temanan ku ya a bini dilanti den e JVO aki. E siguiente JVO lo tuma lugá na Boneiru ku Hulanda komo anfitrion, riba dianan 16, 17 i eventualmente 18 di yüli próksimo.

 

Ministerio konserní