Publiká riba 14 Desèmber 2018
Konforme e lei di Enseñansa di Fundeshi, kada skol di fundeshi, mester disponé di un komishon di mayor. Meta di e komishon di mayor ta pa atendé asuntunan di interes di e alumnonan di skol, den konsulta ku un i tur ku ta envolbí pa asina konhuntamente yega na un bon koperashon ku gerensia di skol i funshonamentu optimal di e skol en kestion.
Tarea di e komishon di mayor ta pa asistí mayornan ku e kontakto ku e skol, suministrá informashon na otro mayornan di e skol den konsulta ku e direktor di e skol. Por lo demas e komishon ta duna konseho na e direktor di skol relashoná ku tur asuntunan di e skol.
Aktualmente Ministerio di Enseñansa, Siensia, Kultura i Deporte ta atendiendo e lei di Enseñansa di Fundeshi, relashoná ku reglamentu di e komishon di mayor pa skol di fundeshi pa asina tur skol operá segun esaki.
Entrante 1 di yanüari 2019 Ministerio di Enseñansa, Siensia, Kultura i Deporte ta atendé tur asuntu di skolnan, direktamente ku e komishon di mayor di e skol segun e lei.
Ku esaki e rekonosementu di ReMa Uní komo organó kordinadó di komishon di mayor pa enseñansa di fundeshi ta keda disolvé.
Kada direktiva di skol mester vigilá pa kada skol di fundeshi ta disponé di un komishon di mayor manera e lei di Enseñansa di Fundeshi ta preskribí. Servisio di Skolnan Públiko (DOS) ta responsabel pa vigilá pa skol di fundeshi ku ta kai bou di nan responsabilidat.
Banda di instalashon di komishon di mayor na kada skol di fundeshi, pronto alabes Minister Marilyn Alcalá-Wallé ta instalá un Plataforma di Mucha pa stimulá inklushon di muchanan i hóbennan den forma di diálogo den tomo di desishon ku tin di haber ku e.o. nos enseñansa. E plataforma di muchanan i hóbennan tin e derechi di duna keho i konseho pa asina drecha maneho di nos skolnan i hasi enseñansa mas efektivo i plasentero pa nos muchanan. Pa medio di inklushon di hubentut den diálogo, e hubentut ta kontribuí na edifikashon di nos pais (nation-building).
Finalmente e Ministerio di Enseñansa, Siensia, Kultura i Deporte ta bai reuní mas frekuente ku nos hóbennan di Parlamento Hubenil pa asina sigui stimulá inklushon di nos hóbennan.
Klik aki pa tuma nota di un karta di Minister Marilyn Alcalá-Wallé dirigí pa direktiva di ReMa Uní relashoná ku e tópiko ariba menshoná: Karta pa Rema Uní.
