Publiká riba 23 Sèptèmber 2019
Ta bon pa informá hinter komunidat un biaha mas ku Direktiva di skolnan na Kòrsou ku ta wòrdu supsidiá dor di gobièrnu, tin mandato for di sèptember 2018, esta aña pasá, pa tuma e prekoushonnan nesesario den tempu di kalor ekstremo.
For di djaweps 13 di sèptember 2018 Direktivanan di skol i Minister Alcalá-Wallé a yega na un akuerdo ku kada direktiva di skol por pasa over pa apliká e asina yamá “tropenrooster”/skema trópiko (skol ta kaba entre 10 or pa 11 or di mainta) pa e skolnan kaminda ta nesesario. Tur skol su situashon i kondishon ta diferente; esaki tumando nota ku tin skol- i klasnan mas kalor ku otro i e echo ku sierto skol tin airco i fan, mientras otro no. Alabes tin un kantidat di skol ku tin klasnan konstruí di material ku den kalor por bira bastante sofokante. Den tal situashon e direktiva di skol den estrecho koperashon ku e Ministerio di Enseñansa, Siensia, Kultura i Deporte ta sera e skol o klasnan en kuestion (lokual a sosodé tambe siman pasá). Kada direktiva tin e espasio pa apliká e “tropenrooster”/skema trópiko segun nan posibilidatnan.
Finalmente ta importante pa menshoná ku Ministerio di Enseñansa den estrecho koperashon ku GMN, e Ministerio di Salubridat, na 2018 a traha riba un guia/ richtlijnen pa atende ora ta kalor. Esaki tambe tur direktiva di skol ta disponé di dje for di 2018. Importante por ehèmpel ta pa bebe mas tantu awa, hasi menos aktividat sofokante, bisti trahe un poko mas liviano, krea mas pousa/espasio pa bebe awa.
Kaminda ta nota ku e situashon no ta soportabel i hóbennan ta bira inkomodó o malu, ta duna espasio pa nan por bai kas.
**************************************
