Publiká riba 21 Aprel 2023
Willemstad – Den e último siman di aprel lo tin matansa di animal solamente riba
djárason 26 di aprel na Parera i lo no tin matansa na Barber riba djabièrnè 28 di
aprel.
Motibu pa esaki ta ku departamentu di Asuntunan Veterinario a organisá un kurso di
“upgrading” pa entre otro su personal kaminda ta trata e proseso di sakrifisio di
animal den su totalidat, inkluyendo bienestar di animal, higiena i téknika di matansa.
Personal di abatuar di Kòrsou, Aruba, Boneiru i St. Eustatius lo forma parti di e kurso
aki.
E kurso lo tuma lugá di 24 di aprel te ku 28 di aprel 2023 na abatuar Parera i lo ser
duná dor di e instituto renombrá riba e tereno aki: SVO vakopleiding – Food.
Ta importante pa sòru pa e konosementu di nos personal di matansa di animal keda
na nivel i pa sigui ku desaroyonan mundial riba e tereno spesífiko aki. Di e forma aki
por brinda un servisio na nivel haltu manera mester ta, pa ku e proseso di sakrifisio i
kùr, ya e produkto final ta seif pa e konsumidó.
Nos ta pidi indulgensia di kriadónan di bestia pa ku esaki.
Por yama òf app kùrmester pa un sita pa matansa via 689 1291 / 685 1292 òf pa
mas informashon por manda un e-mail na info.uovz@gobiernu.cw
###
