Notisia

WILLEMSTAD – Ministerio di Enseñansa, Siensia, Kultura i Deporte (ESKD) ta informá ku tin kambio den e prosedura pa pidi eksonerashon den kuadro di enseñansa obligatorio pa alumnonan ku tin ku biaha pafó di dianan di fakansi. Mayornan awor por hasi e petishon pa eksonerashon na skol di e yu. No mester mas di dokumentashon adishonal di Ministerio di ESKD.

Mester hasi e petishon na skol di e yu, pa e kabes di skol aprobá esaki. E skol ta aprobá dor di traha un deklarashon di eksonerashon/biahe ku stèmpel di skol i firma di e kabes di skol. E mayor NO mester pasa mas na sektor di Enseñansa i Siensia (OW/UOW) di Ministerio di ESKD den Bonbini Business Center, pa haña eksonerashon.

E petishon di mayor pa eksonerashon di biahe, mester kontené e siguiente informashon:

• Nòmber di yu;
• Fecha di nasementu di e yu;
• Motibu pa kiko e yu mester haña eksonerashon;
• Nòmber i number di sédula di e mayornan;
• Nòmber i adrès di e skol.

E kambio akí a drenta na vigor entrante 1 di desèmber 2021 i ta bai tin un periodo di transishon te ku 31 di yanüari 2022. Pa mas informashon adishonal por tuma kontakto ku skol di e yu, pero tambe kolaboradornan di enseñansa obligatorio sra. Natalie Davelaar-Kirindongo riba natalie.davelaar-kirindongo@gobiernu.cw òf sra. Gifna Maria na gifna.maria@gobiernu.cw.

MAS NOTISIA

Ministerio konserní: Enseñansa, Siensia, Kultura & Deporte