Kambio na kaha di Ontvanger entrante 1 di òktober 2021 - Informashon tokante Gobièrnu di Kòrsou Bo opinion

Notisia

Kambio na kaha di Ontvanger entrante 1 di òktober 2021

Geplaatst op 19 September 2021 dor di Ministerio Finansa

Willemstad – Entrante promé di òktober 2021 lo no akseptá sèn kèsh, ni chèk mas na lokèt di Ontvanger. Solamente lo por ‘swipe’ pa hasi pago.

Ontvanger tin 2 lokalidat kaminda por paga:

WTC na Piscadera:

  • por paga tur impuesto ku eksepshon di kompra di seyo;
  • bali di informashon;
  • drenta areglo di pago;
  • atministrashon di number di outo: tuma plachi di number; overschrijving; entregá plachi.

Eden Mall riba Caracasbaaiweg:

  • por paga tur impuesto ku eksepshon di kompra di seyo;
  • bali di informashon;
  • drenta areglo di pago te ku fl 5.000,00.

Na tur lokalidat di ACU i di Cpost tambe ta ‘swipe’ pa hasi pago.

Cpost:

  • tur pago di number di outo (mester buska e plachi di number na WTC);
  • kompra di seyo.

ACU:

  • tur pago di number di outo (mester buska e plachi di number na WTC).

Tur pago na Cpost i ACU lo ta liber di gastu pa e pagadó di impuesto.

Banko

Por paga tambe via banko òf paga online ku uso di e referensia di pago úniko korekto (betaalkenmerk). Mester paga  kada impuesto online pa kada periodo separá. Asin’aki e kliente di Servisio di Impuesto tin siguransa ku kada un pago ta registrá korektamente i ku Ontvanger por prosesá e pago outomátikamente den e sistema. 

Pago di diferente impuesto huntu manera impuesto riba ganashi, impuesto riba benta i impuesto riba entrada, tur huntu den un transakshon bankario, ta sòru pa tardansa i eror na momentu di prosesá diferente montante, ya ku no por mira tur ora kua suma ta pertenesé na kua impuesto. 

Importante pa remarká den esaki ta ku transakshon hasí via online banking ku Ontvanger lo no tin gastu adishonal na siguiente banko: Maduro & Curiel’s Bank, Banco di Caribe, Orco Bank, RBC Royal Bank, Vidanova Bank i First Caribbean International Bank (CIBC).

Pagomátiko

Pa por paga tambe via Pagomátiko mester bini ku e aanslag – esta e papel di belasting – riba kua por mira ta kua tipo di impuesto ta trata di dje, e montante i tambe e karakterístika di pago, esta e ‘betaalkenmerk’, kual ta konsistí di 17 sifra ku semper mester indiká komo deskripshon pa e pago. 

Despues di yena e karakterístika di pago, ta bon pa chèk sigur si e ta korekto. Despues ta konfirmá e transakshon i di e forma ei, finalisá e proseso. Pagomátiko tambe ta un servisio grátis i ku e kliente por hasi na e ora ku ta kumbiní e mes. Por paga e sigiuente tiponan di impuesto i prima tantu di negoshi komo privá: AOV/AWW, AVBZ, Basis Verzekering Ziektekosten (BVZ), Nominale Premie di BVZ, ‘Inkomstenbelasting’, ‘Logeergastenbelasting’, ‘Loonbelasting’, ‘Omzetbelasting’ (OB), ‘Onroerende Zaken Belasting ‘(OZB), ‘Successiebelasting’, ‘Winstbelasting’, i ‘Grondbelasting’. 

Tambe por paga riba un areglo di pago, pero mester paga riba un number di ‘aanslag’ den e areglo i no riba e number di areglo.

Ministerio konserní