Publiká riba 23 Sèptèmber 2022
Willemstad- Algun tempu pasá, Ministerio di Desaroyo Ekonómiko (MEO) a anunsiá algun kambio den e Areglo di Makutu Básiko anterior i tambe ku e vershon adaptá akí (Makutu Básiko 2022) lo mester a drenta na vigor entrante promé di sèptèmber último. Despues ku esaki a bira konosí, miembronan di e asosiashon di komèrsio por mayor (groothandel) BVCA huntu ku miembronan di Curaçao Manufacturers Association, a mustra nan desakuerdo ku e adaptashonnan dor di inisiá un kaso den korte kontra Gobièrnu. E kaso den korte ainda ta kanando su proseso i pa e motibu aki, Minister di Desaroyo Ekonómiko, sr. Ruisandro Cijntje huntu ku MEO a yega na e desishon pa wanta ku aplikashon di Makutu Básiko 2022 te na momentu ku korte tuma un desishon.
Esaki ta enserá tambe ku, por lo pronto e tim di Inspekshon Ekonómiko lo sigui hasi kontrolnan rutinario a base di e Areglo di Makutu Básiko anterior.
Konsiderando e krísis finansiero i e situashon sosial ekonómiko ku nos pueblo ta pasando aden pa motibu di faktornan manera e pandemia di COVID-19 i e guera entre Rusia i Ukraína, MEO su responsabilidat ta pa hasi loke ta na su alkanse pa mitigá e efektonan akí mas tantu posibel. Ku esaki na mente, MEO ta komprometé na sigui traha i buska formanan inovativo i kreativo pa pone nos ekonomia gruadualmente bèk riba pia.
