Publiká riba 26 Yüli 2018
Willemstad – Servisio pa Obra Públiko ta anunsiá ku a hasi algun adaptashon/kambio na e Plenchi di Tráfiko ‘Yubi Kirindongo’ na Zegu. E kambionan aki ta pa alsa seguridat di tráfiko den e plenchi. OW a marka den e plenchi ku liñanan blanku, i esakinan ta guia e outomobilista pa loke ta e kambionan vigente. Tambe a pone bòrchinan di tráfiko pa guia tráfiko.
Un outomobilista ku ta aserka e plenchi for di kualke direkshon mester:
1) Disidí adelantá kua direkshon e ta bai,
2) Paga bon tinu na e bòrchinan di tráfiko ku ta indiká ken tin preferensia i ken no tin,
3) Skohe e via pa bai e direkshon deseá segun e liñanan blanku riba kaminda ta indiká,
4) No kambia di via (‘wave’) miéntras ku bo riba e plenchi,
5) Ora ku a sali kaba for di e plenchi, ‘sorteer’ drenta e via pa bai den e direkshon deseá
Ehèmpel:
Na momentu ku e outomobilista ta bin for di Banda Bou pa bai direkshon di aeropuerto, e por skohe adelantá e via na su man robes I keda den e via aki te ora e Sali for di e plenchi. Na salida, e ta ‘sorteer’ drenta e via ku ta sigui direkshon aeropuerto.
OW ta pidi tur outomobilista ku ta hasi uso di e plenchi aki pa tene bon kuenta ku e kambionan nobo ku ta na bienestar di nan mes. Sigui e liñanan riba kaminda i paga tinu na e bòrchinan di tráfiko.