Kaminda pa bai Wespen na altura di Tera Corá ta bira mas bunita - Informashon tokante Gobièrnu di Kòrsou Bo opinion

Notisia

Kaminda pa bai Wespen na altura di Tera Corá ta bira mas bunita

Geplaatst op 19 April 2017 dor di Ministerio Tráfiko, Transporte i Planifikashon Urbano

Kaminda pa bai Wespen na altura di Tera Corá ta bira mas bunita

Willemstad – For di dia 20 di aprel próksimo, tráfiko ku ta bai òf bini for di Wespen mester tene kuenta ku opstakulisashon na altura di Tera Corá. Esaki debí na trabounan di plantashon di mata riba e asera mei mei di e kaminda. Durante di e trabounan ta desviá tráfiko pa pasa via di e kayanan di Tera Corá, segun e ruta riba bòrchinan di desviashon. E proyekto ta embeyesé e kaminda i ta sòru pa asta mas seguridat den tráfiko.

E trabounan ta tuma un máksimo di dies dia, inkluyendo djasabra. E plantashon di mata ta nifiká finalisashon di e proyekto ˈRenobashon di Kaminda di Wespen na altura di Tera Corá, ku a kuminsá den 2015. Ta hasi esfuerso pa kaba e trabounan mas lihé posibel, pa asina okashoná ménos molèster pa tráfiko i un bunita resultado final pa e proyekto. Plantashon ta bai den dos fase, kuminsando na e parti wèst di e krusada elevá na California supermarket. Despues ta sigui ku e di dos fase na parti ost di e krusada elevá.

E matanan ku e kontratista Kwekerij Exotische Tuinen N.V. ta bai planta, ta yega Kòrsou un dia promé ku e proyekto di plantashon ta kuminsá. Pa sigurá ku e matanan ta keda den bon kondishon, ta importante pa planta nan mas lihé posibel. Minister Jaime Cordoba, di e ministerio konserní, ta pidi tur hende ku ta hasi uso di e kaminda, pa durante di e periodo di dos siman nos dilanti, tene kuenta ku e sitashon di tráfiko na altura di Tera Corá. 

 

 

Ministerio konserní