Publiká riba 20 Novèmber 2018
Djasabra dia 1 di désèmber:
MINISTERIO DI SALUBRIDAT, MEDIO AMBIENTE I NATURALESA TA URGI MAYORNAN PA BAKUNA NAN YUNAN KU FALTA BAKUNA DEN KAMPAÑA DI BAKUNASHON NA OFISINANAN DI KONSULTA NA JANWE, KAS CHIKITU I STA. MARIA
WILLEMSTAD — Djasabra dia 1 di Désèmber 2018 awor, Ministerio di Salubridat, Medio Ambiente i Naturalesa ta bolbe organisá un di dos kampaña di bakunashon pa mucha di 0 pa 18 aña. Mayornan por bini ku nan yunan ku falta bakuna na dos ofisina di konsulta di Departamentu Salú Hubenil ku ta na Janwe(Cederstraat) i na Kas Chikitu i tambe na un ofisina di konsulta di Wit Gele Kruis na Sta. Maria. E orario na tur tres lokashon lo ta di 8 or di mainta pa 12 or di mèrdia.
E bakunanan ku tur mucha mester haña for di momento ku nan a nanse te ku dia ku nan tin 10 aña di edat ta pa protehá kontra di e malesanan Difteria, Kinkhus, Tétano, Haemophilus influenza tipo B, Hepatitis B, Pneumokòk, Sarampi, Kachete, Sarampi Aleman i Polio. 95% di muchanan na Kòrsou mester ta bakuná kontra di e malesanan aki pa un bon protekshon.
Segun e delaster informashon di e organisashon regional di salubridat PAHO, tin diferente di e malesanan ariba menshoná na entre otro Venezuela i nan ta krusando frontera pa henter Latino Amerika i Caribe. Na Kòrsou ta tuma e situashon hopi na serio, pasobra ta kalkulá ku entre 80 pa 90% di muchanan so ta bakuná. E kantidat aki ta abou i esey ta pone ku nos ta kore riesgo di haña brote di e malesanan. E konsekuensia di e malesanan ta hopi serio i por okashoná daño permanente di salú i por kondusí te asta na morto.
Pa por subi e kantidat di muchanan ku mester haña e bakunanan aki, Ministerio ta urgi tur mayor pa bin ku nan yunan ku falta bakuna na un di e 3 ofisinanan di konsulta ariba menshona riba djasabra dia 1 di désèmber próksimo.
Pa mas informashon por yama na 737-0000, por manda whatsapp na 670-1900 o email na info.dsh@gobiernu.cw . E bakunashon di djasabra dia 1 di désèmber awor na tur 3 lokashon ta grátis i no mester traha afsprak. Kada mayor mester presentá ku karchi di angua di e yu si tin esaki.
