Bo opinion

Notisia

Kandela na Sabana Hundu kousando hopi molèster di huma

Geplaatst op 08 January 2020 dor di Ministerio Hustisia

Willemstad – Un kandela grandi di sushi den área di Sabana Hundu a sòru pa hopi molèster den e área di Muizenberg, St. Jacob i bisindario. Brantwer a risibí notifikashon djasabra 04 di yanüari alrededor di mitar di 4 di atardi ku lo mester tin un kandela di shushi den area di Sabana Hundu. Mesora un unidat di brantwer a sali den direkshon pa e sitio. Na nos yegada nos a enkontra bolanan di sushi basta grandi ku tabata na kandela. Mesora brantwer a kuminsá ku trabounan pa paga e kandela. E kandela a desaroyá di tal manera ku no por a kombatí esaki sin hasi úso di ‘loader’. Tambe tabatin algun eksploshon ku tabata tuma lugá den e bola di sushi, kual ta krea un situashon peligroso pa por kombatí e kandela. Personal di Brantwer a tuma e desishon, teniendo kuenta ku nan mes seguridat pa tuma medidanan di seguridat. A limpia rondó di e sushinan ku ya tabata na kandela ku ‘loader’ pa prevení ku esaki ta ekspandé i kousa mas peliger i molèster. Na e momentunan aki brantwer no por hasi mas trabou pa kaba di kombatí e kandela, pa motibu ku esaki ya ta un ‚kandela di fornu‛.

Un apelashon ta bai na habitantenan, skolnan i negoshinan di entre otro Sabana Hundu, Muizenberg, St. Jacob, Suffisant i bisindario pa tene bentananan i portanan di kas i/ of edifisionan sera. Personanan ku ta eksperensiá molèster i/ of personanan ku ta sufri di un malesa respiratorio ta ser konsehá pa bandoná e área i keda na un otro sitio. Habitantenan di barionan den serkania mester tene kuenta ku molèster di holó di huma por permanesé algun dia.

Ministerio konserní