Kantidat rekòrt di alga marino Sargassum ta bolbe drif yega Kòrsou - Informashon tokante Gobièrnu di Kòrsou Bo opinion

Notisia

Kantidat rekòrt di alga marino Sargassum ta bolbe drif yega Kòrsou

Geplaatst op 28 March 2019 dor di Ministerio Salubridat Públiko, Medio Ambiente i Naturalesa

Despues di
eksaktamente un aña,

Kantidat rekòrt di alga marino Sargassum ta bolbe drif yega Kòrsou  

Willemstad – Despues di eksaktamente un aña e alga marino Sargassum (S. Fluitans i S. Natans) a bolbe drif yega Kòrsou asotando e mes sitionan atrobe. Aña pasá un kantidat rekòrt di e alga a yega Kòrsou pero tur kos ta indiká ku e aña aki lo kibra e rekòrt di aña pasá. Algun boka na kosta nòrt di Kòrsou ta kompletamente yená ku un pakete diki di Sargassum. Otro islanan den Karibe manera Trinidat i Jamaica tambe a eksperenshá inmenso molèster di e alga aki.

Aki na Kòrsou meskos ku otro islanan den Karibe ta buskando e mihó manera pa atendé ku e situashon aki ku awor si a keda konfirmá di ta presentá anualmente. Minister di GMN mr. Suzanne Camelia- Römer ya a indiká na su ministerio pa entre otro kue muestranan signifikativo di e alga pa investigá posibel uzo den agrikultura. Di e manera aki nos lo por transformá algu ku ta okashoná molèster den benefisio agrario. Aña pasá a eksplorá e posibilidat pa instalá un “boom” na entrada di boka Ascensionku ta ubiká den serkania di barionan pa evitá ku e boka aki ta yena ku Sargassum i okashoná molèster di holó stinki pa habitantenan. Esaki no a duna e resultado deseá pa motibu entre otro di e laman brutu na nòrtkant. Últimamente a diseñá un “boom” pa forma un barera spesífikamente kontra Sargassum i spesial pa laman brutu. GMN ta studiando aplikashon di e sistema aki pa mira ku e por duna nos resultado positivo.

Orígen di e kantidat enorme aki di Sargassum den Karibe probablemente ta kambio di klima i resultado di uzo intensivo i na gran eskala di entre otro fertilisantenan den industria di agrikultura. E fertilisantenan aki ta yega laman despues di yobida intenso i ta promové kresementu masal di Sargassum i konsekuentemente último añanan muchu mas Sargassum ta aparesé den Karibe kompará ku añanan anterior. Limpiamentu di áreanan afektá ku Sargassum no ta un tarea fásil. E ta un labor hopi intensivo i mester hasi uzo di máskara di gas pa evitá efektonan dañino di inhalá Sulfuro di Hidrógeno(H2S).    

Riba potrèt por mira kon Boka Ascension a keda kompletamente tapá ku Sargassum.

                                                                        ###

Ministerio konserní