Den 1662 e desishon a kai na Oropa, Spaña, pa kuminsá hasi negoshi di katibu prosedente di Afrika. West Indische Compagnie (WIC) a kuminsá ku transportashon di katibunan for di e kosta Afrikano pa Sur-Amerika. Den e akuerdo ku WIC, a palabrá ku Hulandesnan lo a transportá un kantidat di katibu, kaminda Kòrsou lo a fungi komo haf di transito.
Kòrsou den realidat a bira mas ke esei. I na Kòrsou e maluso di forsa laboral di esnan esklavisá, a lanta un tremendo rebelion na Plantashi Kenepa na 1795 ku nos heroe Tula na kabes. Pa motibu di traishon di un otro katibu e rebelion ku den prome instante tabata eksitoso, a frakasá i Tula i otronan a wòrdu kapturá pa e hulandesnan!
Riba 3 di oktober 1795, Tula i otro lidernan Karpata, Louis Mercier i Pedro Wacao i mas katibu a keda torturá i likidá. Nan mester a paga ku nan bida, pa finalmente sklabitut a wòrdu abolí dia 1 yüli 1863, 156 aña pasá!
Komo rekuerdo, na Kòrsou na diferente parti den e area di Bandabou i tambe na Rif, nos ta enkontrá shete (7) monumento blanku ku un man i un pida kadena na e man ku ta indiká e kaminda di resistensia (The trail of resistance).
******
