Publiká riba 25 Sèptèmber 2018
Kickstart Curacao Innovathon dia 19 di Oktober ta e evento pa Korsou huntu traha na futuro di nos isla.
Curaçao Innovation & Technology Institute (CITI) i Ministerio di Desaroyo Ekonomiko (MEO) ta organisa un evento ku ta un konsepto nobo riba nos isla.
Djabierne 19 di oktober proksimo lo tuma luga Kickstart Curacao Innovathon na PWFC for di 8or di mainta pa 8or di anochi.
Meta di e evento, ta pa duna komunidat di Korsou e oportunidat, pa huntu traha i brainstorm riba ideanan ku lo tin un impulso positivo pa desaroyo sosial i ekonomiko di Korsou.
Ta un echo ku nos isla ta dispone di un kantidat di mentenan briante i kreativo ku den momentunan difisil ta kapas na krea alternativanan ku por yuda nos mehora nos situashon aktual.
I ta netamente esaki e evento aki lo soru p`e. Empresario, studiante, amtenar I suidadanonan ku un idea of posibel solushon pa un problema ta bini huntu pa traha durante 1 dia pa purba konkretisa e idea aki riba papel. Ta e intenshon pa después di e evento e ganado of ganadonan sigui un trayekto ku guía di CITI i MEO pa yega na akshon konkreto pa ku e idea trese dilanti durante e evento.
Pa yuda delinea e partisipante a krea 5 kategoria den kual por partisipa. Tur ku ta interesa por inskribi entre awe pa 5 di Oktober proksimo riba www.citi.cw . Tin 2 formulario, por inskribi komo persona individual of den grupo di 5 pa 8 persona maksimo. Lo tin dia di informashon pa duna mas informashon i guía prome ku e evento.
Riba dia di e evento mes después di un apertura ofisial di nos minister Martina, partisipantenan lo traha te ku 6or di atardi riba nan proyekto. Durante di e trabounan lo tin fasilitado i mentor ku ta profeshonal den kada 1 di e kategorianan ku lo duna guía i support kaminda ta nesesari na e partisipantenan. Entre 6or pa 8or di anochi nan lo presentanan na idea na demás partisipante, prensa i un panel di hurado incluso nos prome minister.
MEO ta kontentu ku e reakshon te awor pa ku e evento i ku kolaborashon di otro ministerionan manera Ministerio di Asuntunan General i Ministerio di Maneho di Gobernashon, Planifikashon i Servisio Públiko (BPD).
CITI i MEO ta invita tur hende ku tin un idea pa partisipa i duna bo aporte na nos futuro. Nos ta konta ku bo!
CITI, e instituto maksimo di inovashon na Korsou ta sigui traha pa di un forma uniko i kreativo duna realse na nos ekonomia. Pa mas informashon por tuma kontakto ku CITI na 7386299 of info@citi.cw.
