'Kla pa Turismo' ta sigui habri oportunidat pa esnan ku ke un empleo den sektor turístiko - Informashon tokante Gobièrnu di Kòrsou Bo opinion

Notisia

‘Kla pa Turismo’ ta sigui habri oportunidat pa esnan ku ke un empleo den sektor turístiko

Geplaatst op 12 March 2020 dor di Ministerio Desaroyo Ekonómiko

WILLEMSTAD- E trayekto di ‘Kla pa Turismo’ ta sigui move i den kuadro di esaki Ministerio di Desaroyo Ekonómiko(MEO) konhuntamente ku Ministerio di Desaroyo Sosial, Labor i Bienestar (SOAW) i den estrecho kolaborashon ku CHATA a bolbe organisá otro feria di trabou, e biaha aki dirigí na abitantenan di Ser’i Papaya i besindario. E feria di trabou aki a keda organisá pa asina yega mas serka di e habitante ofresiendo esaki posibilidat di un periodo di entrenamentu i trabou sigurá den sektor di hospitalidat.

E trayekto di ‘Kla pa Turismo’ ta un inisiativa pa yuda akapará entre otro e demanda pa trahadónan kompetente den sektor di turismo. Den e trayekto aki, siudadanonan mayor di edat, ku aktualmente no tin trabou i ku ke traha den e sektor ta haña e oportunidat pa ser entrená i despues risibí un di e kuponan di trabou disponibel den un di nos establesimentunan di horeca lokal.

Pa por yega mas serka di e pueblo, ‘Kla pa Turismo’ a drenta barionan di Kòrsou kaminda un i tur por yega libremente sea pa mas informashon òf pa registrá nan mes pa un di e puestonan disponibel. Resientemente e tim di ‘Kla pa Turismo’ a organisá ferianan di trabou den bario di Barber i Montaña i djaweps 12 di mart último a toka turno na Ser’i Papaya i besindario. Puestonan aktualmente disponibel den e trayektoria ta entre otro komo asistente di servisio, agente di seguridat den Hospitalidat, asistente di kushina òf servisio di limpiesa i mantenementu (houskeeping). Esaki, mirando ku ‘Kla pa Turismo’ ta traha den estrecho koperashon ku establesimentunan di horeca lokal, i esakinan ta posishonnan ku a keda indiká ku tin mester di empleado riba término korto. Un total di 73 habitante di Ser’i Papaya i besindario a asistí na e feria di trabou aki.

Di e personanan ku a keda registrá, a skohe 15 persona ku siguientemente lo kuminsá sigui kurso i preparashon den e trayekto ‘Kla pa Turismo’, 2 lo hiba un entrevista mas, 2 tin un puntuashon promedio, 3 no por sigui, 11 ta preferá un trayekto pa bira entrepreneur, 40 lo drenta trayekto regular.

Apesar ku e feria di trabou aki tabata enfoká mas riba e nesesidatnan den sektor turístiko, a tuma tambe dato di personanan ku a akudí ku ta buska trabou den otro ramonan.

E intenshon ta ku MEO, SOAW i CHATA lo sigui move ku e proyekto di ‘Kla pa Turismo’ i yega mas serka di siudadanonan. Di e forma aki Gobièrnu ta trata na sigui minimalisá mas ku ta posibel kualke barera ku lo por pone ku un persona ta pèrdè oportunidatnan pa yega na empleo.

 

 

Ministerio konserní