Publiká riba 23 Aprel 2023
WILLEMSTAD- Resientemente algun kliente di prizòn bou di guia di personal di SDKK, a hasi trabounan di limpiesa na Stadion di Rif. Despues di e limpiesa akí por a opservá un kambio hopi grandi den e Stadion. E trabounan a ser hasí rápido, den un korto tempu i na satisfashon. Señor Urny Floran, District Administrator di Curaçao Little League, i presidente di Curaçao Little League Foundation a gradisí e detenidonan i tambe gerensia di prizòn pa e koperashon.
Gerensia por a komprondé ku meta prinsipal di e proyekto akí ta pa e kuater selekshonnan di Baseball Little League, divishon Junior i Senior League ku ta bai representá Kòrsou den kampeonato Latinoamerikano i di Caribe, por hasi uso temporal di e tereno akí pa training. Gerensia di SDKK ta sumamente kontentu di por a forma parti di e proyekto akí ku ta duna un kontribushon na nos hóbennan deportista di Kòrsou. Riba foto por mira e klientenan ta limpiando e Stadion di Rif.
