Publiká riba 01 Yüli 2022
WILLEMSTAD – Un total di 30 kliente di prizòn a tuma e desishon pa kambia nan bida i sigui Kristu.
Ta trata aki di klientenan ku ta sigui formashon i guia spiritual den prizòn, bou di kordinashon di señor Marlon Jamanika.
Durante un seremonia di boutismo ku a tuma lugá bou di guia di Pastornan Angela, Snoep i un delegashon di Prizòn Fellowship International, e klientenan akí a ser batisá i bendishoná pa drenta un bida nobo. Tabata un mainta bendishoná ku alabansa, orashon i adorashon na Kristu.
E inisiativa akí a lanta despues ku klientenan a aserká gerensia ku e petishon pa nan por batisá i demostrá ku nan a i ke kambia nan bida i bira un mihó hende den komunidat.
Gerensia di prizòn a sostené e aktividat akí, konsiderando ku un gran kantidat di kliente ku a sigui e rumbo akí den pasado a bira personanan ehemplar den nos komunidat i tambe den eksterior. E gran mayoria di nan no a regresá prizòn nunka mas.
