Klousura di proyekto 'Waste no more' - Informashon tokante Gobièrnu di Kòrsou Bo opinion

Notisia

Klousura di proyekto ‘Waste no more’

Geplaatst op 18 November 2021 dor di Ministerio Desaroyo Sosial, Labor i Bienestar

Willemstad – Dia 12 di novèmber último, 15 partisipante a risibí nan sertifikado, despues di a finalisá e proyekto ‘Waste no more’. Durante e proyekto ‘Waste no more’, e partisipantenan a haña oportunidat pa atkerí eksperensia di trabou, ritmo i disiplina di trabou, siña un fishi den práktika i amplia nan abilidatnan sosial durante un aña. Despues di finalisá e trayekto, 11 di e 15 partisipante a haña un trabou i asina a kumpli ku e meta prinsipal di e proyekto. Minister di Ministerio Desaroyo Sosial, Labor i Bienestar (SOAW), Sra. R. Larmonie Cecilia, a hasi entrega di e sertifikadonan di partisipashon na e partisipantenan.

SOAW ta para pa integrashon di personanan, ku tin ònderstant komo fuente di entrada, den e sirkuito produktivo. SOAW ta deseá pa nan por proveé pa nan mes den nan nesesidatnan básiko. Un di e medionan importante pa logra esaki ta pa desaroyá proyektonan edukativo i di rekapasitashon.

Proyekto ‘Waste No More’ ta un proyekto derivá for di e programa ‘Formashon Personal i Desaroyo’. E meta prinsipal di e proyekto aki ta pa prepará partisipantenan pa subi merkado laboral i mantené nan mes riba merkado laboral. E proyekto ‘Waste No More’ a keda ehekutá den koperashon ku “Green Phoenix”, ku tin hopi ekspertisio riba e tereno di resiklahe di plèstik. E proyekto no ta kontribuí solamente na formashon, desaroyo i preparashon di e partisipantenan, pero tambe na redukshon di e problema mundial di kontaminashon di nos medio ambiente.

Ministerio konserní