Kobradó di ònderstant ku ainda tin problema ku karchi, pasa na Kas di Bario - Informashon tokante Gobièrnu di Kòrsou Bo opinion

Notisia

Kobradó di ònderstant ku ainda tin problema ku karchi, pasa na Kas di Bario

Geplaatst op 30 December 2019 dor di Ministerio Desaroyo Sosial, Labor i Bienestar

Willemstad – Riba 30 di novèmber 2019 Ministerio di Desaroyo Sosial, Labor i Bienestar (SOAW) a logra depositá e montante di NAf. 100,- riba kuenta di tur kobradónan di ònderstant. A konstatá despues ku tin algun kobradó di ònderstant ta konfrontando difikultat pa kobra nan bonus. Na momento ku nan trata na saka sèn for di e mashin di bankomátiko, nan ta mira ku e sèn tei, pero nan no por lanta e sèn. E mashin ta bisa nan pa tuma kontakto ku banko.

Entretantu diferente kliente di SOAW a bai otro bankomátiko i a logra lanta nan sèn. Pa resolvé e problema, SOAW ta pidi tur esnan ku tin e problema aki pa nan purba na un otro mashin di bankomátiko di Maduro & Curiel’s Bank (MCB).

Ora ku aña habri, SOAW ta urgi esnan ku ainda tin e problema aki pa no reklamá funshonamentu di nan karchi di banko na MCB, pero pasa na Kas di Bario pa SOAW por registrá personanan ku tin e problema menshoná.

Minister Koeiman, tim di maneho i tur sektor di SOAW ta deseá nos klientenan un plasentero kambio di aña den seno familiar.

Ministerio konserní