Publiká riba 10 Mei 2023
Willemstad- Djárason, 10 di mei 2023 durante un bishita di trabou na Aruba, Minister di Desaroyo Ekonómiko sr. Ruisandro Cijntje a firma un Memorando di Entendimentu (MOU) ku Minister Geoffrey Wever di Asuntunan Ekonómiko, Komunikashon i Desaroyo Sostenibel di Aruba na nòmber di Gobièrnu di Kòrsou. Meta di e MOU akí ta, pa mustra e deseo, komo islanan ruman, pa sigui traha huntu pa mehorá e posishon ekonómiko di ámbos pais i kon nos por logra un integrashon mas konkreto di nos merkadonan. Awor ku e MOU ta firmá, Kòrsou i Aruba ta bai enkaminá realisashon di esaki pa medio di un ‘roadmap’ ku ta indiká 
spesífikamente kiko ta bai ta e palabrashonnan konkreto i den ki tempu nos lo ke logra kada un di esakinan.
Den e kolaborashon akí e MOU ta menshoná por ehèmpel áreanan manera formalisashon di e areglo mutuo (Onderlinge Regeling) ku ta trata akseso na 
merkado entre Aruba i Kòrsou ku e meta pa fasilitá komersio entre e dos paisnan. Tambe ta bai konsentrá riba stimulashon i fasilitashon di mas invershon di empresarionan for di Aruba na Kòrsou i viseversa. Esaki, mirando ku último tempu ya kaba tantu Kòrsou komo Aruba a tuma nota di e interes di empresarionan pa invertí na e pais ruman i e MOU akí ta bai yuda fasilitá esaki di forma konkreto pa asina komplementá i sostené otro su desaroyo ekonómiko. Un di e áreanan ku tambe sigur ta bini bèk den e MOU akí ta e koperashon riba tereno di kompetensia hustu entre empresanan (Fair Trade Authority); e Outoridatnan di Kompetensia di tantu Aruba komo Kòrsou ta mihó sirbí si nos uni konosementu i forsa di ámbos pais.
Ku firmamentu di e MOU akí, Kòrsou i Aruba ta konkretisá e proseso pa empresarionan di ámbos pais por tin akseso liber na tantu merkado di Kòrsou komo Aruba pero tambe reforsá nos posishon komo paisnan chikitu den merkado internashonal. Komo islanan, nos tin retonan den por ehèmpel invershon i infrastruktura ku ta kumbiní mas pa nos kolaborá i reforsá e posishon di ámbos. Realidat ta, ku nos tin retonan komun, pero huntu nos tin mas oportunidat i solushon tambe pa e retonan akí. Riba esaki, Minister Cijntje a indiká 
durante firmamentu di e MOU: “Mi ta mira hopi posibilidat pa hasi kosnan huntu i saka mayor benefisio. Por ehèmpel kumpra fruta ku berdura huntu, planta nos mes kuminda ku nos por abastesé otro i komplementá otro. Riba vários tereno nos por ‘team up’ i konkistá mundu huntu. Ban enfoká riba kon nos por komplementá otro i fortalesé otro i konkista nos region i tambe sobra di mundu.”
Pa Kòrsou por logra un kresementu ekonómiko sostenibel i ta un isla i pais resiliente ekonómikamente, nos mester diversifiká nos ekonomia i krea mas merkado pa nos kompanianan por hasi negoshi. Nos strategia di Eksportashon ku nos ta implementando sigur ta yuda fortifiká nos empresanan pa nan por kompetí. Nos ta mira un potensial grandi den nos region i tambe mas leu. Di mes manera nos ta serando akuerdonan ku Colombia, Repúblika Dominikana, Trinidad & Tobago i Sürnam. Nos forsa ta den union i ekonómikamente nos lo sigui traha pa fortalesé e union akí.
