Kolaborashon entre prison di Sint Maarten i Kòrsou pa ku sastreria - Informashon tokante Gobièrnu di Kòrsou Bo opinion

Notisia

Kolaborashon entre prison di Sint Maarten i Kòrsou pa ku sastreria

Geplaatst op 05 July 2018 dor di Ministerio Hustisia

WILLEMSTAD—Klientenan di St. Maarten ku ta detené na Kòrsou ta yuda pasa nan konosementu i abilidatnan pa nan ko-klientenan den prisòn Sentro di Detenshon i Korekshon Kòrsou (SDKK). Den liña di resosialisashon: ta trata di un konosementu positivo i ta p’esei a skohe pa hasi uso di dje. Nan ta hasi trabou produktivo. Lòs di e echo ku nan ta siudadano di Sint Maarten, tòg SDKK ta yuda pa aportá den kuadro di nan proseso di resosialisashon.  

E klientenan ta siña pa kose unifòrm pa e personal di SDKK.

Kuater kliente di St. Maarten den pasado tabata den un trayekto di sastreria na prisòn Pointe Blanche promé ku orkan Irma a pasa i destruí esaki ku a resultá den un alokashon obligatorio pa un par di nan den prisòn SDKK na Kòrsou.  

E proyekto di sastreria ta wòrdu supervisá dor di señor Carlos Gomez, ku por sierto tambe ta e instruktor di sastreria na prizon Pointe Blanche na

St. Maarten. E proyekto di interkambio aki ta pa usa ekspertonan di tur dos prisòn pa motibu di e situashon finansiero ya konosí. SDKK a traha riba e proyekto aki for di aña 2013, pero dor di diferente motibu esaki nunka a wòrdu implementá. “Dor di duna e klientenan di St. Maarten un lugá den e proyekto aki nan ta yuda SDKK tambe,” señora Malvina Cecilia, Hefe temporal di e Unidat di Korekshon responsabel pa resosialisashon den SDKK ta splika.

Na òktober 2017, e ministernan di Hustisia de Weever (St. Maarten) i Quincy Girigorie (Curaçao) a bishitá e klientenan di St. Maarten spesífikamente riba petishon di minister di St. Maarten den SDKK, kaminda e klientenan a ekspresá nan prekupashon mayor ku tabata pa nan por haña un trabou pa asina nan por sòru pa nan mes.

Girigorie, ku su punto di lansa ta pa instituí trayekto- i proyektonan di resosialisashon pa tur kliente, a hasi un petishon na maneho di SDKK pa asistí e klientenan di St. Maarten den nan petishon. Na mei 2017, ora ku minister Girigorie a asumí su responsabilidat, e a suprayá e importansia di e eksistensia di resosialisashon den un forma struktural, permanente i profeshonal den SDKK.

E promé reto grandi, den e proseso di resosialisashon, segun señora Cecilia ta sigui e esfuersonan konhunto i nesesario pa prepará i ekipá e klientenan mentalmente pa asina nan por tin un mihó chèns riba un eksistensia balioso i duradero komo siudadano den komunidat. Prehuisio ta eksistí.

E di dos reto grandi ta pa kambia i/òf ahustá e imágen ku komunidat tin di èks-klientenan di SDKK. E imágen aktual ta opstakulisá un aseptashon digno i real, señora Cecilia ta sigui splika. Na mart último, e klientenan di St. Maarten den SDKK ya kaba a demostrá nan abilidatnan positivo dor di pone un smail riba kara di diferente alumno di e skol Dr. Nelly Winkel pa medio di e proyekto pa e temporada di Pasku di Resurekshon.

Tur kliente di SDKK por a partisipá na e proyekto aki. Mester bisa ku e klientenan di St. Maarten huntu a traha un kantidat di 150 fli en total. Huntu por a hasi un donashon na e alumnonan di e skol ya ariba menshoná ku ta un skol ku ta duna enseñansa speshal.   

Ministerio konserní