Notisia

Gobiernu di Korsou ta (re)konfirmá Proklamashon di Tula i otronan, ku a hiba e lucha historiko komo Héroe Nashonal.

Nos héreo nashonal Tula, ta mas ku un luchadó pa libertat pa su hendenan. E ta símbolo pa Libertat, Respet, Igualdat i Hermandat. Similar ku e palabranan inspirativo di e Revolushon Franses: Liberté, Egalité i Fraternité.

Sinembargo, riba e dia di awe mi ta pensa ta ken ta Tula? Kua ta su balornan, su empeño i kiko lo e a nifika den aña 2017?

Parti di e kontesta aki no ta haña den e tesoro di un komposishon Rignald Recordindo ‘Tula Warda’:

“Tula b’a sinja nos kon lucha, kon bringa pa nos hanja nos balor. Mira, mira ki ironía, nos lucha ya no ta kontr’e opresor,
nos ta bringa otro, si nos mes ta bringando otro ….. ni un tin kadena na nos pia. Pero tin di nos su lomba, mester karga inhustisia kada dia. Ahinda tin miseria…”

Mirando e Korsou den aña 2017 i balornan ku segun mi Tula a para p’e, mi ta konvensí ku su lucha pa libertat lo a kontinuá … den e siguente manera:

• Libertat – pa un bida trankil den bario i abilidat pa move ront Korsou sin teme pa nos seguridat
• Mente i alma liber – sin kompleho i un espiritu di ‘nos por!’. Un mente habri pa kambio i desaroyonan nobo;
• Libera nos hendenan di pobresa – nos no por sigui akseptá restraso sosial den nos barionan i ku muchanan ta bai skol ku hamber. Pero tambe libera nos di pobresa mental, kaminda nos balor komo hende no ta wòrdu midi pa kiko nos tin, pero pa nos karakter … ken nos ta i kiko nos ta nifika pa otro;
• Gana respet – amor i respet pa nos mes; kaminda nos ta wòrdu tratá ku respet, pero tambe trata otro ku repet. Kaminda nos ta apresiá nos diversidat i diferensianan, pero alabes ta uní den nos identidat kultural, sosial i ekonimiko. Ta asina nos ta logra gana respet i nos prominensia den region i den Reino;
• Tula lo a lucha pa mas partisipashon ekonómiko pa tur hende. E desaroyo inklusivo manera stipulá den nos Plan di Desaroyo Nashonal (SDG8). Kaminda menos hende no lo depende riba otronan pa nos pan, pero ku nos ta para riba nos propio pia komo empresario;
• Igualdat i hermandat – Tula a lucha kontra disigualdat i abuso den nos kumunidat i e lucha aki tin ku sigui. Akseso igual na enseñansa di kalidat, akseso na bibienda digno, partisipashon na aktividatnan sosial, kultural i ekonomiko, pero tambe protekshon di derechonan humano (mucha).

Ku esaki mi a konkluí ku Tula i su kompañeronan ainda tin balor grandi pa nos komunidat riba e dia di awe i ku e lucha pa libertat tin ku kontinuá.

Manera Doble su piesa ta bisa:

• ma tur kos por drecha nos tin tinu pe
• ma tur kos lo kambia nos tin tinu pe

Konfirmando Tula komo nos héroe nashonal, nos ta bon na tinu, ban traha huntu pa nos realisá nos máksimo potenial, komo hende, komo pueblo i komo ún nashon. Tula no por warda muchu mas. Ban logra bienestar pa nos pueblo ku e konvishon i espiritu di Tula di ‘Nos Por!’

Riba e pòrtrètnan por mira Gobièrnu di Kòrsou i Promé Minister Eugene Rhuggenaath huntu ku – su èks maestro na Peter Stuyvesant College – Drs. Frank Quirindongo, presidente di Plataforma Sklabitut i Herensia di Sklabitut.

MAS NOTISIA

Ministerio konserní: Asuntunan General i Promé Minister