Publiká riba 06 Sèptèmber 2023
WILLEMSTAD- Djamars 5 di sèptèmber 2023, Sentro di Detenshon i Korekshon Kòrsou (SDKK) a risibí bishita di parlamentarionan di Komishon di Hustisia.
Meta di e bishita akí tabata pa e parlamentarionan di Komishon di Hustisia sera konosí ku tim di maneho di SDKK i tambe haña un rekorido den e instituto.
Parlamentarionan ku tabata presente na e okashon akí tabata: sr. Braam komo presidente di Komishon di Hustisia, sr. Mercelina komo vise-presidente di e Komishon di Hustisia, sr. Brownbill, sra. Nita, sr. Seferina, sra. Jesus-Leito, sr. Martinez i 2 personal di Griffie di Parlamento di Kòrsou.
Durante e seshon ku tim di maneho di prizòn a bin diferente preguntanan dilanti enkuanto finansas, retonan ku tin diariamante, eskases di personal, seguridat i e parti di resosialisashon di klientenanan den SDKK. Tambe durante e rekorido den e instituto tabatin oportunidat pa e parlamentarionan di Komishon di Hustisia interkambiá ku klientenan di e blòknan ku a keda bishitá.
Gerensia di SDKK ta sumamente kontentu di por a risibí Komishon di Hustisia di Parlamento di Kòrsou i lo keda pendiente pa un siguiente bishita di trabou.
