Komishon Nashonal Kòrsou ku treining eksitoso - Informashon tokante Gobièrnu di Kòrsou Bo opinion

Notisia

Komishon Nashonal Kòrsou ku treining eksitoso

Geplaatst op 11 March 2020 dor di Ministerio Enseñansa, Siensia, Kultura & Deporte

WILLEMSTAD – Ministerio di Enseñansa, Siensia, Kultura i Deporte ta enkarga ku e Komishon Nashonal di UNESCO i su sekretariado na Kòrsou. E Komishon Nashonal di UNESCO Curaçao a organisá dos dia di treining pa e miembronan di e Komishon. Meta di e treining aki tabata pa familiarisá e miembronan di e komishon ku e organisashon UNESCO pa asina haña un mihó bista riba e agenda spesialisá di Nashonnan Uní. A enfoká riba e tareanan i debernan di un komishon, tareanan di e sekretario general i presidente di e komishon entre otro. Riba invitashon di Curaçao e sekretario general di e Komishon Nashonal di UNESCO Jamaica Everton Hannam a duna e treining aki huntu ku sekretario general UNESCO Curaçao Marva Browne i Richenel Ansano e fasilitador internashonal pa UNESCO riba tereno di herensia kultural intangible.

Minister di Enseñansa, Siensia, Kultura i Deporte sr. Eugene Rhuggenaath a haña oportunidat pa sera konosí ku e komishon i tambe e Sekretario General di UNESCO Jamaica sr. E. Hannam. Minister Rhuggenaath a hasi uso di e oportunidat pa mustra riba e importansia di e treining aki i tambe riba e trayekto kaminda e Sustainable Developments Goals (SDG) ta di gran balor pa desaroyo duradero den kuadro di e metanan pa aña 2030 di Nashonnan Uní. Tur esakinan ta trayektonan ku ta kana huntu pa logra ku e pais ta yega na e metanan stipulá konforme e agenda 2030 di desaroyo duradero i akuerdonan internashonal.

Den kuadro di e trayektonan aki Gobièrnu di Kòrsou ta traha riba unidat pa huntu logra inklushon sostenibel i alabes stimulá e kapasidat di desaroyo i motivashon pa nos komunidat ku ta brinda mas oportunidat ekitativo pa nos mes hende.


KOMUNIKASHON

**Riba e potrètnan athunto por tuma nota di Minister sr. E.Rhuggenaath, Direktor di maneho sra. S. Larmonie-van Heydoorn, Sekretario-General di UNESCO Jamaica sr. E. Hannam, Sekretario-General di UNESCO Kòrsou Sra. Marva Browne i miembronan di Komishon Nashonal di UNESCO Kòrsou. Pa mas potrèt por klik aki: Relato Fotográfiko

Ministerio konserní