Komishon pa Enseñansa Speshal ta keda instalá - Informashon tokante Gobièrnu di Kòrsou Bo opinion

Notisia

Komishon pa Enseñansa Speshal ta keda instalá

Geplaatst op 18 September 2021 dor di Ministerio Enseñansa, Siensia, Kultura & Deporte

WILLEMSTAD – Minister Sithree ‘Cey’ van Heydoorn ta firma e dekreto pa instalashon di un komishon i instalá e komishon ku ta bai traha speshalmente pa nos muchanan di enseñansa speshal.  Tarea prinsipal di e komishon ta pa duna asistensia na muchanan ku mester bai skol speshal i keda aloká den e grupo/kluster adekuá. E komishon aki ta forma parti di un trayekto pa e sektor di enseñansa di fundeshi speshal. 

E miembronan ku a keda instalá ta profeshonalnan di enseñansa ku tin tur e kapasidat pa duna e mihó konseho den e área di enseñansa di fundeshi speshal. E miembronan ta: sr. E. Perigault Monte (Presidente), sra. T. Winklaar (Ortopedagogo), sra. R. Rosheuvel  (profeshonal den enseñansa speshal), sra. P. Maria (sekretaro di e komishon) huntu ku kolaborador di maneho sra. S.Braun. E komishon aki a keda instalá den presensia di Direktor di Maneho sra. S. Larmonie-van Heydoorn, Direktor di Enseñansa i Siensia sr. W. Kleinmoedig i Inspektor General sra. R.Martina-Bitorina.

E komishon aki ta sali for di e lei di enseñansa di fundeshi i e maneho pa enseñansa speshal. E komishon ta haña tur informashon nesesario di e alumno ku mester bai un skol speshal pa nan analisá i duna un konseho kua skol i den kua grupo e mucha por keda aloká. E análisis ta keda hasí segun un protokòl i den koperashon ku direktivanan di skol i mayornan di e alumno. Pa mas informashon por mail na OWCS.Communicatie@gobiernu.cw.

Gobièrnu ta duna tur mucha e atenshon nesesario i sin distinshon, paso tur mucha ta importante pa desaroyo optimal di nos nashon. Pesei Ministerio di Enseñansa, Siensia, Kultura i Deporte huntu ku Minister van Heydoorn ta sumamente kontentu ku e komishon komo ku esaki ta un logro mas pa nos muchanan di enseñansa speshal. 

 

**riba e fotonan athunto por tuma nota di e instalashon di e miembronan den sala Multi-Funkshonal Jerry Lasten na Fòrtí.

Pa mas potrèt por bishitá aki: Ministerio di ESKD

Ministerio konserní