Publiká riba 19 Febrüari 2024
WILLEMSTAD – Riba djaluna 19 di febrüari 2024, Konseho di Minister a tene un reunion ku un delegashon di e komishon fiho pa relashonnan den Reino (KOREL) di e Eerste Kamer der Staten-Generaal. E komishon akí tin komo tarea e trabounan di preparashon pa skibi proposishonnan di lei ku ta referí na e partinan Karibense di Reino i legislashon di Reino. E komishon tambe ta tene deliberashonnan tokante maneho di e mandatarionan responsabel pa relashonnan den Reino i ta mantené kontakto ku parlamentarionan di Aruba, Kòrsou, Sint Maarten, Boneiru, Sint Eustatius i Saba.
Anualmente, un delegashon di e komishon ta bishitá e partinan Karibense di Reino pa informá nan mes tokante e desaroyonan denter di e paisnan akí. E delegashon ya tabata di bishita na Aruba, Sint Maarten, Boneiru, Sint Eustatius i Saba promé ku reuní awe ku Konseho di Minister di Kòrsou na Avila Beach Hotel. Durante e reunion, entre otro e siguiente temanan a ser diskutí: e refinansiamento di e fiansanan di COVID, e situashon aktual pa yega na un solushon relashoná ku e problemátika di ENNIA, e trayekto di saneamentu na benefisio di Curaçao Medical Center (CMC), e lei di sankshon i anulashon di e obligashon di visa pa personanan di desendensia Dominicana.
