Publiká riba 03 Ougùstùs 2021
WILLEMSTAD – Dia 29 di yüli 2021 e organisashon di salú di animal, OIE, a publiká ofishalmente ku a konstatá “Peste Porcina Africana” (PPA) na Sto. Domingo. E malesa aki ta afektá porko i ta sosodé dor di kontakto ku un virùs ku ta permanesé den karni fresku i prosesá (p.e. wòrst) di porko, kadaver di porko infektá òf artíkulo kontaminá. Manera ta konosí importashon di produkto di karni for di Sto. Domingo tabata prohibí kaba pa motibu di un malesa similar “Peste Porcina Clásica” (PPC). Pero awor e tipo más ferfelu pa kombati aki a drenta e país konsekuentemente nos mester ta èkstra vigilante na nos fronteranan pa evitá su entrada. E virùs no ta afektá hende.
Ultimo dos añanan e malesa aki a plama substanshalmente na Asia i Oropa kousando daño ekonómiko enorme dor ku mester a deshasí di miones di animal pa purba di dominá e malesa. No tin vakuna adekuá pa juda kombati e malesa.
Den e kuadro ei departamentu di Asuntunan Veterinario a tuma diferente medida pa evitá entrada di e malesa i su efektonan desastroso pa krío di porko. Primeramente, a informá e kriadonan di porko pa asina subi nan konosementu di e malesa aki i kon pa protega nan krío. Tambe a urgi kompanianan di buelo pa informá i kontrolá e pasaheronan pa ku e prohibishon di importashon di karni den nos país i a informá aduana pa ta más alerta pa ku e vigilansha i kòntròl di maleta of karga na aeropuerto di pasaheronan for di Sto. Domingo. E medidanan ku a implementá for di 2019 den forma di pone konteinernan informativo na luganan stratégiko na aeropuerto pa asina pasaheronan por deshasí di karni òf produktonan derivá di karni ku tin den nan posishon ta vigente.
Ademas e departamentu lo perkurá pa alsa e nivel di alerta i ehekutá e preparashonnan nesesario pa monitoreá e salú di porkonan i mitigá un eventual brote den nos país.
