Bo opinion

Notisia

Komunikashon stratégiko pa kambio di komportashon

Geplaatst op 17 January 2020 dor di Ministerio Desaroyo Sosial, Labor i Bienestar

Willemstad – Kòrsou ta pará na un punto krusial den su desaroyo komo pais i pues tambe den e proseso di emansipashon di su pueblo. Nos ta konfrontando diferente reto ku definitivamente tin ke ber ku desaroyonan rondó di nos isla ku a influensiá nos fuertemente. Sin embargo, nos ta konstatando tambe ku un kantidat di situashon ta eskalá, debí na e echo ku te ainda nos no ta komportando manera debe ser.

Pa ilustrá por menshoná diferente akshon, tantu preventivo komo represivo, di gobièrnu, pa kontrarestá un kantidat di komportashon inaseptabel den e era ku nos ta biba, por ehèmpel: X-team pa kastigá komportashon no deseá ku tin impakto negativo riba medioambiente, instrukshon violensia relashonal pa mustra ku no ta tolerá violensia relashonal, plan di maneho di seguridat pa atendé di forma integral ku e problematika di seguridat den i rondó di skolnan i guia intensivo den kasnan di famia den un intento pa salba e núkleo di nos komunidat.

E problemanan menshoná ta pidi pa kolaborashon entre ministerio, NGO, dunadónan di trabou, prensa i otro aktornan klave den nos komunidat. Ademas di kolaborá den un intento pa nos inisiativanan komo gobièrnu ta mas efektivo, ta imperativo traha riba kambio di komportashon.

Durante e konferensia organisá pa Interlandelijke Taskforce Kinderrechten na mei último na Sint Maarten, e delegashon di Kòrsou tabatin e oportunidat úniko di sigui un workshòp di señor Everold Hosein, un eksperto den komunikashon ku ta apliká un metodologia ku e mes a desaroyá (COMBI) pa alkansá kambio di komportashon kolektivo. Señor Hosein tin eksperiensia vasto ku trayektonan largu di kambio di komportashon, hasiendo uzo di komunikashon, na vários pais rònt mundu. El a traha riba un kantidat grandi di proyekto den nos region, pero tambe na otro partinan di mundu, pa tantu World Health Organization, UNDP i Unicef.

Resientemente señor Hosein a bishitá Kòrsou, kaminda el a tene un workshop pa splika su metodologia na un grupo di empleado públiko di e siguiente ministerionan: Ministerio di Asuntunan General, Ministerio di Desaroyo Sosial, Labor i Bienestar, Ministerio di Ensañansa, Siensia, Kultura i Deporte, Ministerio di Hustisia i Ministerio di Salú, Medioambiente i Naturalesa. A partisipá tambe diferente NGO, representantenan di Universidat di Kòrsou i representantenan di Parlamento Hubenil.

Ministernan Camelia-Römer i Koeiman tambe a asistí na e workshop aki i tur dos tabatin e oportunidat di komprondé, pa medio di ehèmpelnan mundial di sektor públiko i privá, kua ta e faktornan ku berdaderamente ta hunga un ròl den kambio di komportashon kolektivo.
Bishita di señor Hosein, un nativo di nos region, tabata e promé paso den un trayekto ku lo kondusí na ehekushon di un plan stratégiko di komunikashon, enfoká riba kambio di komportashon kolektivo.
E workshop aki tabata un esfuerso di kolaborashon entre Plataforma Plan Nashonal kontra Violensia i Plataforma IVRK (derechi di mucha).

Pa mas informashon por tuma kontakto ku Ministerio di Desaroyo Sosial, Labor i Bienestar na 434 04 28 òf 434 04 51.

Ministerio konserní