Konbenio di Enseñansa ku SITEK, dirigí riba sirkunstansianan di labor ta den pleno ehekushon - Informashon tokante Gobièrnu di Kòrsou Bo opinion

Notisia

Konbenio di Enseñansa ku SITEK, dirigí riba sirkunstansianan di labor ta den pleno ehekushon

Geplaatst op 16 August 2018 dor di Ministerio Enseñansa, Siensia, Kultura & Deporte

Dia 10 di ougùstùs 2016 a sera un akuerdo e asina yamá “Konbenio di Enseñansa, dirigí riba sirkunstansianan di labor” (Onderwijsconvenant Arbeidsomstandigheden) entre Minister di Enseñansa, Siensia Kultura i Deporte di e tempu ei i SITEK. Riba 14 di ougùstùs 2017 e akuerdo aki a keda formalisá pa Gabinete Rhuggenaath. Despues di e formalisashon di e akuerdo, Ministerio di Enseñansa, Siensia, Kultura i Deporte a kuminsá ku ehekushon di e akuerdo.


Un aña despues di e fecha aki ya kaba diferentre trabounan ku a keda akordá entre e partidonan a keda realisá. Asina por ehèmpel tin un gran kantidat di kondishonnan di labor ku ta konta pa empleadonan públiko ku ta traha den ofisina, ku tambe a keda apliká pa e personal di enseñansa resientemente.
E kondishonnan ta konta spesialmente pa asuntunan manera:
1. pago di Bonus di Pasku;
2. pago di kilometer pa trabounan ehersé durante orario di trabou riba petishon di e direktiva di skol konserní;
3. pago di gastunan relashoná ku aksidentenan durante orario di trabou òf na momento ku ta hasi uso di propio outo;
4. kompensashon adishonal pa okupashon temporal di funshonnan di maneho di skol, kaminda solamente un persona ta apuntá den e funshon di maneho di skol;
 I HOPI MAS … …

Den kuadro di e konbenio tambe a hasi investigashon riba eskases di personal di enseñansa (Commissie Schaarste Leerkrachten) kaminda e raportahe final di yüni 2018 a keda entregá na Minister Marilyn Alcalá-Wallé i alabes a tene un presentashon pa e titular di enseñansa. Tin diferente Diálogonan Nashonal ku a keda organisá segun e prinsipio di Democratic Dialogue, kaminda prioridatnan a keda stipulá konhunto i tambe konferensianan pa sigui fiha direkshon den enseñansa.

Ta importante ku SITEK a bira miembro di Centrale Commissie van Vakbonden (CCvV) i partner di Georganiseerd Overleg in Ambtenarenzaken (GOA) kaminda for di e momento ei e asuntunan di posishon hurídiko den e konbenio di personal por keda tratá den un forma struktural i institushonalisá.

Lokual a keda palabrá den e konbenio ta keda ehekutá strukturalmente. E akuerdo ta den avanse. Enseñansa ta un totalidat dinámiko kaminda ta importante pa keda fihá riba e desaroyonan ku ta tuma lugá den komunidat. Nos mester keda konektá i sigui bai dilanti. Muchanan i hóbennan tin derecho riba enseñansa ku ta atraé nan, kaminda nan ta desaroyá nan talentonan i kaminda nan ta keda stimulá pa manifestá nan potensialnan. Kada miembro di personal di enseñansa tin un papel krusial i magnétiko.

Pa un bista di e komunikado kompletu por download e aki: KOMUNIKADO Konbenio di Enseñansa ku SITEK, dirigí riba sirkumstansianan di labor ta den pleno ehekushon.

 

Ministerio konserní