Publiká riba 01 Yüni 2021
WILLEMSTAD – Awe, djamars promé di yüni 2021, a habri e periodo ku abo por nominá e kandidato ku sigun bo meresé un kondekorashon real. Nos tur ku ta siudadano di Reino Hulandes, tin e oportunidat pa por nominá e kandidatonan ku nos ke honra. Por hasi esaki te ku dia 16 di ougùstùs 2021 pa medio di un formulario (voorstelformulier) yená ku informashon di bo nominado.
Huntu ku señor Curd Evertsz (presidente Komishon Kondekorashon Real) Promé Minister demishonario Rhuggenaath den un konferensha di prensa a duna mas informashon, entre otro tokante kon pa nominá un kandidato i e kaminda ku e nominashon akí mester kana. Tambe a hasi un apelashon na tur siudadano di Kòrsou pa nominá nan kandidatonan.
‘Lintjesregen’
Tur aña riba dia di Rei nos ta duna honor na personanan ku a duna aporte eksepshonal na nos komunidat. Riba e dia akí algun di e nominadonan ta risibí un Kondekorashon Real serka Gobernador di Kòrsou (‘lintjesregen’). E próksimo selebrashon di dia Real ta 27 di aprel 2022. E fecha akí ta mustra hopi leu, pero e prosedura ta tuma tempu. P’esei mester kuminsá for di awor.
Minister Presidente Eugene Rhuggenaath, Curd Evertsz (presidente Komishon Kondekorashon Real)
Ken ta bini na remarke pa keda kondekorá?
Un persona ku ta bini na remarke pa risibí un Kondekorashon ta un persona ku a kontribuí di forma eksepshonal na nos komunidat. E kontribushon por ta sea pa medio di su aporte boluntario na bienestar di nos hóben-, adulto- òf nos grandinan. Tambe un persona ku a kontribuí òf destaká di forma eksepshonal na deporte, enseñansa òf siensia na Kòrsou por bini na remarke pa risibí un Kondekorashon.
Kon abo por nominá bo kandidato?
Ku bo esfuerso bo por kontribuí pa un persona por risibí rekonosementu na nivel di Reino Hulandes. Pa nominá bo kandidato bo mester buska, yena i entregá e ‘voorstelformulier’ pa hasi bo petishon. Huntu ku e ‘voorstelformulier’ tambe bo mester entregá algun dokumento importante. Banda di informashon di kontakto di e nominado, tambe mester entregá informashon tokante trabou, aktividatnan sekundario i méritonan speshal pa kual e persona ta keda nominá. Ta di gran importansia pa dos òf mas persona sostené e petishon akí ku un karta di motivashon. Tene kuenta ku e idioma den kual mester manda e informashon ta Hulandes. Despues ku yena e formulario mester deposit’é den un buzon na Lokèt di Pèrmit.
Kiko ta pasa despues?
Komishon di Kondekorashon ta evaluá i kontrolá tur informashon ku nan a risibí te ku 16 di ougùstùs 2021. Despues di evaluá i kontrolá tur informashon e komishon ta entregá tur e dokumentunan konserní di nominadonan na Gobièrnu di Kòrsou pa trata esaki den Konseho di Minister. Seguidamente e dokumentunan akí ta bai pa Gobernador, ku na su turno ta manda esakinan Hulanda pa evaluashon i aprobashon final. E trayekto akí ta tuma tempu, p’esei bo mester entregá informashon di bo nominado na tempu.
Bo tin pregunta òf ke mas informashon?
Si bo mester di yudansa pa yena e formulario òf si bo tin pregunta, tuma kontakto ku Curd Evertsz òf un di e otro miembronan di Komishon Kondekorashon Real (Lucy Tielen, Nicole Maduro, Edgar Sintiago i Roland Colastica).
Email: kondekorashonreal.cur@gmail.com
Telefòn: +599 9 510-0299
Tambe por buska mas informashon riba:
www.gobiernu.cw
www.lintjes.nl
Komishon Kondekorashon Real: Roland Colastica, Edgar Sintiago, Lucy Tielen, Eugene Rhuggenaath, Nicole Maduro, Curd Evertsz.
E ‘voorstelformulier’ ta optenibel na Lokèt di Pèrmit (Saliña 127).
Tambe por ‘download’ e ‘voorstelformulier‘ na www.gobiernu.cw.
