Konferensha di trabou di Unidat di Korekshon den SDKK - Informashon tokante Gobièrnu di Kòrsou Bo opinion

Notisia

Konferensha di trabou di Unidat di Korekshon den SDKK

Geplaatst op 04 July 2018 dor di Ministerio Hustisia

Importansia, komprenshon i akuerdo general pa ku uniformidat den kuadro di resosialisashon interno i eksterno di klientenan di SDKK

Na luna di mei último, gerensia di SDKK, personal di e Unidat di Korekshon i diferente hefenan di otro departamentunan interno, a partisipá na tres dia di konferensha di trabou. Esaki a wòrdu organisá dor di SDKK den kolaborashon ku entre otro ekspertonan lokal i den Reino. E biaha aki a toka turno na Federatie Antilliaanse Jeugdzorg, Stichting 180 i Multi Dimensionele Familietherapie. E konferensha di trabou a karga komo tema: “Uniformidat den kuadro di resosialisashon na Kòrsou”. A skohe pa usa e tema amplio pa asina konhuntamente para ketu na e impakto i implikashon ku resosialisashon tin riba e maneho, e personal, e kliente, e instituto riba su mes en partikular i alabes e komunidat di Kòrsou en general.

Durante e dianan di konferensha di trabou a para ketu i pone atenshon na primordial e responsabilidat di gobièrnu. E siudadano diariamente ta keda konfrontá direktamente òf indirektamente ku krímen òf konsekuensianan di krímen. Esaki ta kondusí na ménos trankilidat den pueblo. Tur hende tin e derechi pa biba trankil i sin miedu. E mester por traha, biba i rekreá sin ta konstantemente pendiente di su seguridat, lokual ta un derechi fundamental di kada siudadano. Ta tarea di gobièrnu pa krea e kondishonnan ku ta garantisá e siudadano e derecho aki.

Seguidamente a para ketu na e maneho, personal i kliente di SDKK. Esaki ta enserá un maneho ku a kategorisá entre otro e diferente karakterístika- i talentonan di kliente detené den SDKK. Teniendo kuenta ku e eksistensia inevitabel di e problemátika di desabilidat mental leve pa asina apliká medida-, metodika-, programa- i proyektonan sistemátiko i sientífiko ku ya a demostrá nan mes. Esakinan mester dirigí e kliente den e direkshon deseabel pa evitá komportashon desviante i/òf residivismo. Resosialisashon mester inisiá for di momentu di detenshon. Den e kuadro aki, gerensia i personal di SDKK, huntu ku entre otro FAJ, Stichting 180 i MDFT a para ketu na e echo ku ta nesesario pa ekipá maneho i personal di SDKK i alabes komunidat di Kòrsou ku e pensamentu i aktitut nesesario, paralelo na e trayekto di formashon, estudio, desaroyo i konsientisashon di e klientenan durante di nan detenshon. Tur

esnan presente tabata di akuerdo ku otro ku prevenshon i resosialisashon mester ta dirigí pa gran parti riba hóbennan. Akinan por bisa ku a mustra riba e importansia di e laso- i/òf relashonnan ku famia i/òf un ròl modèl di e kliente durante di detenshon. Esaki ta wòrdu mirá komo un posibel apertura i/òf inisio den kuadro di Hustisia Restorativo.

Finalmente e para ketu na e parti di aseptashon di e kliente di parti di komunidat pa por integrá na un manera honesto i aseptabel. Prevenshon i resosialisashon ta un responsabilidat di henter komunidat. Mester impedí ku despues di tur esfuerso ku wòrdu hasi durante di karselashon, esnan ku a kometé un delito i a resosialisá, ta keda sin haña un trabou durante di nan periodo di resosialisashon den komunidat. Ta p’esei den e promé i sigur e di dos parti di aña 2018 lo sigui invertí tempu den kontakto ku sektor privá i alabes partisipá na proyektonan kaminda klientenan ta duna un aporte boluntario i/òf pagá na komunidat di Kòrsou. E kolaborashon ku SDKK ta propagá pa durante di karselashon duna insentivo na sektor privá pa e hóben-/klientenan aki realmente por haña un segundo oportunidat.

Pa esaki por ta eksitoso mester bini ku programanan di konsientisashon pa komunidat kompletu.

Prevenshon i resosialisashon ta eksihí tambe un koperashon di diferente organisashonnan den e kadena hudisial mes i otro Ministerionan. Durante e e konferensha di trabou a krea tambe un oportunidat eksklusivo pa e hefe- i direktornan di organisashon den e kadena hudisial, sera konosí i hasi preguntanan dirigí na e ekspertonan invitá, tokante nan eksperensia ku e diferente metodika-, programa- i intervenshonnan ku ta aktualmente ta wòrdu implementá den SDKK.

 

 

 

 

 

 

 

Ministerio konserní