Notisia

WILLEMSTAD – Ministerio di Enseñansa, Siensia, Kultura i Deporte (ESKD), su sektor di Enseñansa i Siensia a tene un promé konferensia relashoná ku enseñansa Obligatorio (Leerplicht) titulá: TUR MUCHA TIN DERECHI RIBA ENSEÑANSA. Minister di ESKD sr. Sithree van Heydoorn a hasi apertura ofishal i durante di esaki a presentá e tim di empleado públiko ku ta enkargá ku enseñansa obligatorio.

Durante di e mainta aki, mas o ménos 190 persona a partisipá na e konferensia ku tabata e promé, di e siklo informativo i partisipativo ku a keda organisá. Miembronan di kuerpo polisial, representashon di sektor di kuido hudisial, tim di maneho di skolnan, direktor i koleganan di fundashonnan ku tin un relashon ku enseñansa i deporte tambe a partisipá na e aktividat aki.

E promé parti e direktor di Enseñansa i Siensia sr. Wladimir Kleinmoedig a tene su diskurso relashoná ku e tema i a indiká ku esaki ta forma parti di e trayekto di mehorashon ku ta kanando den e ministerio di ESKD. Den su mensahe sr. Kleinmoedig a indiká ku e partisipashon di tur presente mester ta pa sigui traha na mehorashon di enseñansa den e kuadro di enseñansa obligatorio, konsiderando esaki komo un esfuerso kolektivo. Minister di ESKD sr. Sithree van Heydoorn na su turno tambe a elaborá riba e tema i pidi tur presente pa partisipá aktivamente i pa duna nan kontribushon debí ku esaki ta e plataforma pa duna esnan envolví ku enseñansa partisipashon den e proseso di optimalisashon di e unidat di enseñansa obligatorio.

Despues a sigui ku presentashon di e orador di órden, ku ta un eksperto den e materia di enseñansa obligatorio, sr. René Halberstadt ku tin su PhD den sosiologia edukashonal i ku tin mas di 25 aña trahando den e área di enseñansa obligatorio. Sr. Halberstadt a gradua ku su tésis ku ta trata influensia di maneho di skol, mayor i hóben nan riba prestashon na skol i ousensia. E orador di órden a tene un presentashon relashoná ku su buki: ‘Opening the Black Box of School Absenteeism’.

Seguidamente a tene un seshon ku tur presente huntu a elaborá i dialogá den grupo riba e tema di enseñansa obligatorio. Despues e partisipantenan a tene diferente presentashonnan for di perspektiva di e gruponan, kaminda nan a trese puntonan importante pa tene kuenta kuné den e kuadro hurídiko i maneho ku ta den preparashon.

Ministerio di ESKD por mira bèk riba un konferensia eksitoso i ku sigur lo kontribuí na mehorashon di nos enseñansa i na e unidat di enseñansa obligatorio, kual ta forma parti integral di e ministerio.

—

KOMUNIKASHON

*riba e potrètnan athunto por tuma nota di e Konferensia Enseñansa OblIgatorio: TUR MUCHA TIN DERECHI RIBA ENSEÑANSa

MAS NOTISIA

Ministerio konserní: Enseñansa, Siensia, Kultura & Deporte