Notisia

WILLEMSTAD – Awe Gobièrnu di Kòrsou a konmemorá e fecha di 30 mei 1969 na vários lokalidat. Tambe nos por a apresiá presensia di su ekselensia sra. Lucille George-Wout i esposo. Esaki a tuma lugá konforme medidanan vigente di entre otro aglomerashon i di distansha sosial. E mainta a kuminsá na edifisio di PWFC kaminda maestro di seremonia sra. Ingelor Keller a hasi apertura di e parti ofisial siguí pa Himno di Kòrsou kantá pa ganadó di festival “Un kanto pa Kòrsou”, sr. Richard Engelhardt. E presidente di PWFC, sr. Angelo Meyer, a hiba palabra enfokando den su spich riba parti di historia di nos emansipashon di 17 ana pasá te ku awor, importansia i derechi di trahadó pa lucha pa su derechi i tambe a ekspresá su deseo for di punto di bista sindikal pa haña partisipashon i pa traha huntu pa hiba nos dushi pais dilanti, sigur den e tempu difísil ku Kòrsou ta konfrontá.

Despues e delegashonnan di ministernan a keda repartí riba diferente ruta i den diferente karavana pa bai diferente sitio: Santana di Sta. Maria, kompañando famia Nita i Gerardina pa pone krans i Santana Groot Kwartier pa pone krans na graf di sr. Guiterrez. Tambe a para ketu un ratu na e monumento “50 aña 30 mei” na Kaya Gerardina-Guiterrez riba nifikashon di e obra ku ta simbolisá e historia di 30 di mei den su totalidat. E obra ta konsistí di un Rosa di Bientu ku ta simbolisá ku nos pais ta formá pa hendenan ku a bini for di diferente nashon i a bini aki pa yuda edifiká nos nashon. E dos wowonan di e kadena ta simbolisá e dos víktimanan na Parera ku ta Manuel Guiterrez i Orlando Gerardina. E stanka fini ta simbolisá vulnerabilidat di bida i e piedranan huntu ku e pedestal, ta símbolo di Willemstad ku tabata i ta sentro di komèrsio di nos pais.

E rekorido a terminá na Plasa Wilson ‘Papa’ Godett ku un seremonia chikitu den presensia di Gobernador, Gabinete Rhuggenaath, Parlamentarionan, representantenan Sindikal i famianan Godett, Nita,  Gerardina i Guiterrez. E seremonia a kuminsá ku ponementu di krans pa representante di PWFC, sr. Alex Molina, representante di famia Godett i Promé Minister, sr. Eugene Rhuggenaath, pa duna honor na tur ku a lucha pa libertat i derechi di igualdat den nos komunidat riba dia di 30 mei 1969. Sr. A. Godett a hiba palabra na nòmber di famia Godett kaminda el a pone enfoke riba e desaroyo di nos komunidat en espesial e situashon di pobresa i derechi di igualdat den reino Hulandes, sigui pa nos Promé Minister sr. Eugene Rhuggenaath, ku na su turno a elaborá riba nos proseso di emansipashon komo pais, e trato di nos mes pa ku otro i nos responsabilidat kolektivo. Promé Minister a pone énfasis riba e nesesidat pa yega huntu na solushonnan pa nos pueblo sigui avansá i pa alkansá bienestar di nos tur, i a terminá su diskurso ku e lema “Solo el Pueblo Salva al Pueblo”! E seremonia a keda klousurá ku deklamashon di e poema ‘Kòrsou papia’, presentá pa e hóben ganadó di Arte di Palabra Shandrey Mingueli.

Gobièrnu di Kòrsou por mira bèk riba un mainta bunita i simpel i ta gradisí tur ku a partisipá i organisá e aktividat aki, pero spesialmente Fundashon Kas di Kultura (KdK) pa su aporte.   Riba e “link” nan aki por tuma nota di 3 video ku a keda produsí pa KdK enkonekshon ku e di 51 aniversario di 30 mei 1969.

‑Video Edishon 1
‑Video Edishon 2
‑Video Edishon 3

**Riba potrètnan athunto por tuma nota di e aktividatnan durante di selebrashon di e delegashonnan inkluso Gobernador sra. L.George-Wout i esposo, Promé Minister sr. E. Rhuggenaath, Ministernan sr. I. Martina, sra. S. Camelia-Römer, sr. K. Gijsbertha, sr. A. Konket, sr. H. Koeiman i sra. Z. Jesus-Leito den presensia di famianan Godett, Nita, Gerardina i Guiterrez.

Pa mas potrèt por klik aki: Relato Fotográfiko Konmemorashon 30 mei 1969.

Live stream di e seremonia Konmemorashon 30 mei 1969 na PWFC

 

Live stream na Plasa Wilson ‘Papa’ Godett