Konmemorashon 52 aña ‘30 di mei 1969’ - Informashon tokante Gobièrnu di Kòrsou Bo opinion

Notisia

Konmemorashon 52 aña ‘30 di mei 1969’

Geplaatst op 28 May 2021 dor di Ministerio Enseñansa, Siensia, Kultura & Deporte

WILLEMSTAD – E fecha 30 di mei 1969 ta keda ankrá komo un fecha históriko sindikal den eksistensia di Kòrsou. E aña akí komunidat ta rekordá 52 aña 30 di mei. Teniendo na kuenta tur e medidanan eksistente di COVID-19, Gobièrnu di Kòrsou ta organisá riba 30 di mei 2021 un konmemorashon den un forma adaptá, na Plasa Wilson ‘Papa’ Godett dilanti pòstkantor na Punda.

Por sigui e konmemorashon via di e páginanan ofisial riba medionan sosial di Gobièrnu di Kòrsou i tambe otro medionan di komunikashon. E konmemorashon parti mainta ta keda transmití ‘live’ di 08:00 pa 09:30.  E programa ta konta ku partisipashon di e lidernan spiritual di e komunidat Hindú, Hudiu, Mòslem i Katóliko. Lo tin presentashon di Jurgen LaCruz & Friends i tambe presentashon di e hóben poeta Ralph Winedt. Ministernan ku ta hiba palabra ta Minister di Enseñansa, Siensia, Kultura i Deporte demishonario i tambe Minister Presidènt demishonario. Lo tin ponementu di krans na e busto di sr. Wilson ‘Papa’ Godett (Q.e.p.d.) i un representante di famia Godett lo hiba palabra.

Despues di e parti ofisial lo sali 3 karavana simultáneamente ku ta bai Kaya Gerardina- Gutiérrez, Santana Santa Maria i tambe Santana Groot Kwartier. Na tur e 3 lokalidatnan lo tin representashon di Gobièrnu di Kòrsou i e respektivo famianan pa pone krans primeramente na e obra “50 aña 30 di mei” trahá pa sr. Yubi Kirindongo (Berg Altena), e grafnan di sr. Nita i sr. Gerardina (Santana Santa Maria) i e graf di sr. Gutiérrez (Santana Groot Kwartier).

Gobièrnu di Kòrsou ta organisá un Debate Públiko ku lo keda transmití via di su páginanan ofisial i tambe via di e kanalnan di televishon lokal di 17:00 pa 18:00. E Debate públiko lo trata e tema “Resiliensia di komunidat di Kòrsou;1969 kompará ku 2021. Similaridat i siñansanan pa surpasá krísis sosio- ekonómiko”. Kordinashon di e debate ta na enkargo di organisashon Debat.Ed (Debate Education Foundation) i ta konta ku partisipashon ku representashon di entre otro akadémiko, sindikalista, polítiko, hóben aktivo i empresario. Esaki tambe ta keda transmitií via di e plataformanan sosial di Gobièrnu di Kòrsou i plantanan di Televishon.


 

______________________________________________________________________

Nota pa redakshon: Pa mas informashon por tuma kontakto ku Sue Ellen Cijntje na number di telefòn + 5 999 527-4101.

Ministerio konserní