Konmemorashon 65 aña Statüt - Informashon tokante Gobièrnu di Kòrsou Bo opinion

Notisia

Konmemorashon 65 aña Statüt

Geplaatst op 12 December 2019 dor di Ministerio Asuntunan General i Promé Minister

WILLEMSTAD – E fecha di 15 di desèmber 1954 ta enserá un mia krusial den e proseso di emansipahon polítiko di Kòrsou ku firmamentu di Statüt. Pues, ku e akto aki ku a tuma lugá 65 aña pasá, Kòrsou su státus polítiko a transformá di unu kolonial pa unu outónomo den Reino. E konbenio estatal aki a keda firmá pa 3 pais, esta Hulanda, Sürnam i Antia Hulandes, di kua Kòrsou e tempu ei tabata formá parti.

Un aspekto fundamental den e kuadro aki ta(bata) ku – a base di igualidat – kada pais lo tabata responsabel pa su maneho interno, miéntras ku kaminda esaki lo a resultá nesesario lo a yuda e otro surpasá kualke forma di kontratiempo ku e ta konfrontá. E pensamentu aki ta deskribí di e siguiente manera riba e Monumentu di Statüt na Saliña Abou: “Steunend op eigen kracht, doch met de wil elkander bij te staan”.

Djadumingu 15 di desèmber benidero Gobièrnu di Kòrsou ta konmemorá firmamentu di Statüt 65 aña pasá na Monumentu di Statüt, durante kua tambe lo duna honor na yunan di tera ku a demostrá sabidoria, liderazgo i patriotismo durante di e periodo di lucha pa Kòrsou logra su Státus Outónomo, manera doktor Da Costa Gomez. Den e kuadro aki, lo para ketu i reflehá riba nifikashon di Statüt pa Kòrsou i kon den nos situashon aktual, Gobièrnu konhuntamente ku komunidat lo por sigui duna kontenido na esaki pa medio di aktonan inspirativo i komprometivo, komplementá pa akshon konkreto i relevante. Mas informashon tokante e akto konmemorativo deskribí ta sigui e dianan benidero pa medio di kanalnan ofisial di Gobièrnu.

Ministerio konserní