Notisia

WILLEMSTAD – Gobièrnu di Kòrsou ta informá ku riba djadumingu 6 di yüli 2025, a tuma lugá un seremonia simbóliko na honor di Almirante Pedro Luis Brion, héroe nashonal i figura históriko den nos lucha pa libertat. Aunke e aña aki, pa motibu imprevisto e “Fundashon Almirante Luis Brion” no por organisá e konmemorashon kustumbrá pero Gobièrnu di Kòrsou ta keda fiel na su kompromiso pa duna e fecha e atenshon meresé.

Seremonia a tuma lugá 9’or di mainta na e estatua di Almirante Luis Brion. Den un seremonia kòrtiku Minister di Enseñansa, Siensia, Kultura i Deporte sr Sithree van Heydoorn a pone un krans na nòmber di Gobièrnu di Kòrsou, den presensia di sr. Max de Groot komo presidente di e fundashon.

Ken tabata Almirante Luis Brion?

Pedro Luis Brion a nase na Kòrsou dia 6 di yüli 1782. E tabata un marinero, negoshante i luchadó pa libertat, ku a laga un marka profundo den historia di Latinoamérika. Brion a tuma parti aktivo den e lucha pa independensia di e kolonianan hispano-amerikano, entre otro den kompania di e Libertador di Simón Bolívar. Su kontribushon militar i finansiero tabata esensial pa logra libertat di paisnan manera Venezuela, Colombia i otro. Komo Almirante di e flota libertador, su liderato tabata vital den bishitanan ku a duna sosten na e rebelion kontra e poder kolonial.

Pa Kòrsou, Almirante Luis Brion ta un símbolo di kurashi, prinsipio i identidat. Su bida i obra ta sirbi komo inspirashon pa pueblo, i su legado ta parti integral di nos historia i nos nashonalidat. Gobièrnu ta pidi atenshon di pueblo na e legado di balentia entrega i patriotismo ku Almirante Luis Brion a laga, komo inspirashon pa tur generashon aktualmente i futuro

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte